DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu extende atividade Grupu Arte Marsiais (GAM) no Arte Rituais (GAM) too 31 Dezembru, tanba iha loron 28 Novembru 2025, Timor Leste sei selebra tinan 50 indepedensia, nunee deside kontinua suspende atividade GAM no GAR.
Xefe Governu hatoo kestaun nee ba jornalista sira, bainhira remata halo enkontru semanal ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Kinta (03/04/2025).
“Primeiru Ministru dehan iha reuniaun Konselhu Ministru hasai dekretu lei ida mos kona-ba Arte Marsiais nee atu halo lei baze ida haruka ba parlamentu mais lei barak tebes entaun ami dehan hein lai ba, ami extende deit labele halo rekrutamentu, labele halo treinu no halao atividade ba Arte Marsiais, Prezidente dehan tanba sa buat nee lao diak, hau dehan lae ami nia hanoin mentalidade Timor nia hanesan nee, ita bele para tiha ona mais buat nee seidauk tama iha ita nia fuan troka fali buat nee mosu agora maizumenus nasaun nee estavel laiha violensia hanesan uluk mais mosu iha neeba, neebe diak liu ita extende nafatin. Ami tau kedas too 31 Dezembru, tanba 28 Novembru 2025 tanba tinan 50 proklamasaun indepedensia neebe halao iha 28 Novembru 1975, tanba nee mak muda too 31 Dezembru, tanba tinan ida nee selebra 50 anos indepedensia,” dehan PM, Xanana.
Primeiru Ministru dehan, Governu extende atividade Grupu Arte Marsiais no Arte Rituais too 31 Dezembru, tanba iha 28 Novembru tinan 2025 Timor Leste sei selebra tinan 50 indepedensia, tanba nee deside kontinua suspende, la signifika katak espesial maibe tinan ida neebe marka istoria ba istoria Timor Leste.
“La dehan espesial, maibe tinan ida neebe boot ba ita nia istoria, tanba nee ami extende tiha, nunee mos foin daudaun nee imi hotu akompanha hau haree hau hakfodak andar boot doko doko hau hanoin atu baku fila iha Mianmar neebe ninia doko doko nee too iha Tailandia, no doko nafatin hodibainrua mos imi la sente ka, ho ida nee mak horiseik ami Konselhu Ministru deside atu haruka netik donativu ruma ba hamutuk ho ASEAN, husi MNEK dehan katak Tailandia mak dehan sira terus liu no Tailandia mos fo hela ajuda, tanba nee mak dehan nee ASEAN nia ita ajuda mak sira neebe terus liu nee,” katak PM, Xanana.
Nunee mos Governu liu husi Konselhu Ministru hasai medida ida nee fo kontinuasaun ba Rezolusaun Governu n. 45/2023, loron 10 fulan-Novembru, neebe mak prolonga ona husi Rezolusaun Governu n. 17/2024, loron 24 fulan-Abril no n. 60/2024, loron 7 fulan-Novembru.
Razaun sira neebe motiva suspensaun ba ensinu aprendizajen no pratikas Artes Marsiais, no halo enseramentu ba ninia espasu sira, mantein nafatin. Medida nee kontinua konsidera nesesariu hodi hametin pas sosial neebe hetan dezde fulan-Novembru tinan 2023 no asegura katak, iha futuru pratika arte marsiais akontese deit iha ambitu desportivu, hodi promove valores dixiplina, sivizmu no formasaun umanista entre joven sira. Ida nee mak sai justifikasaun hodi estende suspensaun no enserramentu temporariu ba instalasaun sira neebe relasiona ho atividade sira nee.
(eme)
