DILI, STLTIMORLESTE.com – Primeiru Ministru (PM), Kay Rala Xanana Gusmão hatete, depois remata selebra aniversariu Polisia Nasional Timor Leste (PNTL) ba dala 25, Governu liu husi Ministeriu Interior hamutuk ho Komando PNTL sei reforma membru PNTL neebe idade ona.
Xefe Governu dehan, iha Konselhu Ministru hasai ona rezolusaun kona-ba promosaun Tranzitoriu iha Polisia, tanba nee depois remata komemora aniversariu PNTL ba dala 25, Governu liu husi MI ho Komando PNTL sei reforma membru PNTL neebe idade ona.
“Horiseik mos ami hasai rezolusaun ida kona-ba promosaun Tranzitoriu iha Polisia, Polisia tinan ida nee halo 25 anos, maibe tanba laiha sistema ida ita haree katuas sira husi kedas 2000-2002 sira nia servisu mak nunee hela deit, estadu la rekonhese sira nia servisu iha neeba, neebe hodiseik ami deskute haree ba ida nee,” dehan Primeiru Ministru, Kay Rala Xanana ba jornalista sira, bainhira remata halao enkontru semanal ho Prezidente Republika, Jose Ramos Horta, iha Palasiu Prezidensial, Nicolau Lobato, Bairru Pite, Dili, Kinta (20/03/2025).
Primeiru Ministru hatete, iha membru Polisia balu neebe servisu kleur ona maibe governu nunka rekonhese nia servisu maske idade ona, lo-loos iha direitu atu reforma ona maibe seidauk no kargu la sae.
“Estadu dehan ba serbisu iha neeba selu o ba servisu servisu ho diak buat sira nee hotu tenke rekonhese oituan, lo-loos nee promosaun Tranzitoriu sei halao antes dia 27 neebe loron nasional PNTL komemora ba loron PNTL ba dala 25 ejiste iha Timor Leste, depois selebra 25 anos mak husi Ministeriu Interior hamutuk ho Komando PNTL atu haree ona se mak iha idade atu reforma, reforma daudaun ona,” dehan PM Xanana.
“Iha nee hau lembra katak semana kotuk hau temi ona kona-ba dijitalizasaun Saude iha Oekusi lansa ona, hau bolu atensaun dijitalizasaun Saude laos dehan katak fo hatene mai 20 Marsu moras 30 mak mai, 15 Marsu moras 2 mak mai labele, ne mak ohin hau dehan kona-ba reseitas nee tama hotu iha neeba hodi bele hatene ida neebe mak servisu diak no ida neebe mak servisu la diak karik buka kurizi, karik la tuir bele ba buka fali servisu iha fatin seluk,” katak PM Xanana.
Nunee mos iha loron kuarta Ministru Interior, Francisco da Costa Guterres aprezenta proposta iha Konselhu Ministrus aprova projetu rezolusaun Governu, neebe define regra promosaun tranzitoria ba membru polisial husi PNTL tuir modalidade neebe prevee iha artigu da-155 Estatutu Polisial nian.
(eme)
