DILI, STLTIMORLESTE.com – Primeiru Ministru (PM), Kay Rala Xanana Gusmão ofisialmente halo abertura ba konferensia internasional ho nia tema “Reforsa Setor Seguransa iha Ambitu Selebrasaun ba Loron FALINTIL ba Dala 50”.
Iha ambitu abertura konferensia internasional nee, Primeiru Ministru (PM) Kay Xanana Gusmão husu ita nia konsentra, estudu no vizaun sira, ba politika laiha aliadu, laiha inimigu, maibe hotu-hotu mesak belun no maun alin deit.
“Rona tiha introdusaun no konkluzaun, hau labele koalia buat barak kona-ba estudu sira, nuudar sidadaun no Primeiru Ministru ho buat hotu neebe ita sei diskute iha nee, hau husu atu ita konsentra ita nia estudu sira no ita nia vizaun ba politika laiha aliadu, laiha inimigu, ita hotu belun no maun alin deit,” katak PM Xanana ba jornalista sira liu husi nia diskursu iha salaun MNEK, Kuarta (20/08/2025).
Xanana dehan, bainhira koalia kona-ba ensinu superior militar, reforma mos sistema defeza no seguransa lideransa no defeza, inserteza iha mundu ida neebe lei internasional aplika deit ba kazu balun iha nasaun sira hanesan Timor Leste.
“Ita tenke tau ita nia objetivu liu husi ita nia esperiensia kona-ba arte kultura dame, promosaun dialogu no rekonsiliasaun haree ba ida nee, ita haree katak area ida nee, rejiaun ida nee sai hanesan rejiaun konflitu, koalia kona-ba ensinu superior militar reforma mos ita nia sistema defeza,” Xanana tenik.
Xanana akresenta, foin daudaun iha situasaun entre Tailandia no Kamboja alerta ona ita atu sai konsiente kona-ba problema sira nee, saida mak ohin ita haree iha nee mak fundamental, mak laiha dame, laiha dezenvolvimentu, maibe mos la ho dezenvolvimentu la iha pas, tanba nee hau loke konferensia importante ida nee.
(EST 1)
