DILI, STLTIMORLESTE.com – Primeiru Ministru Kay Rala Xanana Gusmão hatoo parabens ba Loron Internasional Feto, atu reflete kona-ba papel feto nian iha sira nia misaun no responsabilidade hodi kontribui ba dezenvolvimentu neebe sustentavel.
“Ohin loron ita hotu hamutuk hodi selebra Loron Internasional ba Feto, neebe mak monu iha loron 8 Marsu, maibe ita selebra ohin, iha dia 7 Marsu, hau nia parabens no hakoak boot ba inan feton sira iha mundu tomak, espesial ba inan feton sira iha Timor Leste no sira neebe iha diaspora, selebrasaun ida nee importante tebes, atu ita hotu reflete kona-ba papel feto nian, iha sira nia misaun no responsabilidade hodi kontribui ba dezenvolvimentu neebe sustentavel, liu-liu iha setor krusial sira hanesan saude, edukasaun, justisa, polítika, ekonomia, lideransa no seluk-seluk tan,” hatete Primeiru Ministru, Kay Rala Xanana Gusmão liu husi nia diskursu iha ambitu selebrasaun Loron Internasional Feto, iha Salaun Delta Nova, Sesta nee (07/03/2025).
Xefe Governu informa, bainhira haree ba tema selebrasaun Feto no Labarik Feto iha ninia Direitu, Igualdade no Empoderamentu, fo hanoin mai ita hotu kona-ba inkluzaun feto no labarik feto sira nia direitu, hodi proporsiona igualdade no empoderamentu iha sira nia realidade moris loron-loron nian.
Aleinde nee, tema nee relembra mai ita atu servisu hamutuk hodi halakon desigualdade no diskriminasaun ho formas violensia oin-oin neebe mak sei kontinua akontese, hodi nunee melhora liu tan feto no labarik feto sira iha kondisaun vida, oportunidade ba moris ida neebe dignu, no oportunidade asesu ba servisu esensiais sira.
Timor Leste nuudar Estadu, sai mos parte ba instrumentu legal internasional sira neebe ratifika ona, Estadu Timor Leste mos aprova ona lejizlasaun relevante sira hodi promove igualdade jeneru.
Iha IX Governu Konstitusional asumi responsabilidade no iha kompromisu atu kontinua implementa programa sira neebe fo protesaun ba feto no labarik feto, hodi asegura no garante igualdade no empoderamentu iha sosiedade, partikularmente sira nia envolvimentu no partisipasaun iha dezenvolvimentu ba rai ida nee.
“Iha mundu atual, dezigualdade jeneru, violénsia bazeia ba jeneru no reprezentatividade feto iha kargu neebe foti desizaun, sei enfrenta dezafius ho nivel oin-oin, tanba nee iha ambitu ida nee, TL hakat ona pasu lubuk ida, maibe hau bele dehan, ita sei iha dalan neebe naruk atu perkore, Estadu TL iha kompromisu neebe boot ba promosaun igualdade jeneru, liu-liu reforsa atividade sira neebe enkoraja no empodera feto sira nia partisipasaun iha vida ekonomika, sosial no politika,” hatete Xefe Governu.
Iha fatin hanesan, Vice Presidente do Grupo das Mulheres Parlamentares de Timor Leste (GMPTL), Alianca da Conceicao Araujo hatete, agradese tebes no sente honra boot iha momentu neebe atu taka sesaun komemorativa Loron Internasional Feto nian nee.
“Fo biban ba ita atu hanoin kona-ba progresu neebe ita halo tiha ona no kona-ba dezafiu sira neebe ita sei hasoru nafatin iha luta ba direitu feto no labarik nian, hodi buka igualdade no hodi dezenvolve aspetu hotu-hotu neebe envolve prosesu fo kbiit ba feto no ba labarik iha ita nia sosiedade,” hatete nian.
(joa)
