DILI, STLTIMORLESTE.com – Primeiru Ministru (PM) Kay Rala Xanana Gusmão ho Prezidente Republika (PR) Jose Ramos Horta sente kontente no agradese ba povu Timoroan tanba selebrasaun iha 20 Maiu lao hakmatek, maske mosu konfrontu iha fatin balun.
Kestaun nee hatoo husi Primeiru Ministru Kay Rala Xanana Gusmão ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairu Pite, Kinta (22/05/2025).
“Primeiru lugar hau ho Prezidente Republika atu informa ba povu tomak katak kontente tanba iha selebrasaun tinan 23 Restaurasaun Independensia buat hotu lao diak, maske iha violensia oituan iha fatin balun, haree ba haree mai afinal problema nee arte marsiais nafatin, neebe hau informa ba Prezidente katak Governu sei toma pozisaun ida taka tiha arte marsiais neebe estraga nafatin labarik sira,” katak PM Xanana.
Primeiru Ministru mos apresia ba komunidade tomak neebe durante loron 5 kalan 5 ba iha portu Dili iha feira no konsertu maibe buat hotu lao diak ho estabilidade kapaas tebes.
“Estabilidade neebe kapaas tebes ema la book malu la estraga malu neebe diak, ita tinan oin mai halo restaurasaun ba dala 24, tinan 24 funu no terus no 24 restaura tiha indepedensia mos povu sei terus nafatin, ida nee mak problema boot nafatin ba estadu,” katak PM Xanana.
Primeiru Ministru hatete, Timor Leste hetan ukun aan tinan 23 ona maibe povu sei terus nafatin, ida nee sei problema boot nafatin ba estadu.
“Ohin mos ami koalia problema dezempregu neebe hau atu dehan deit ba Prezidente katak iha hanoin iha planu atu buka oinsa mak ita dudu ita nia setor ekonomiku mais joven sira agora iha deit buat nee, labarik kiik sira seidauk hatene lee mos kaer hotu telefone susar tebes laiha ida hakarak servisu, hakarak buat hotu komputer, leptop deit problema boot mak ida nee duni, mais ita haree tok,” katak Primeiru Ministru.
Aleinde nee Primeiru Ministru hatete, bainhira remata enkontu ho Prezidente Republika sei ba iha CNE atu nunee bele tau hanoin ona ba populasaun liu-liu jerasaun foun katak lalika buka deit servisu ho leptop, komputer, maibe buka hanoin haree oinsa bele partisipa iha dezenvolvimentu nee ho empregu rasik.
Se lae servisu hotu iha funsaun publiku ekonomia la lao, tanba turista barak mai Timor sira hatete we love Timor,,maibe liu deit loron 3 haree fila PM dehan we love ka lae sira dehan mai mos hanesan deit han fali deit hahan neebe sira han iha sira nia rai, selu Hotel karun han hanesan ho hahan iha Bali. Tanba nee redus hahan importasaun.
“Fo hanoin ba jerasaun foun katak empregu laos estadu mak fo lae, hotu-hotu tama polisia, hotu-hotu tama F-FDTL, hotu hotu sai kazual mais ita importa beibeik hahan ho ida nee mak oras oras tan hau sei ba CNE ba koalia hodi foti no hanoin hela tinan mai nee atu harii banku dezenvolvimentu nasional,” hakotu PM Xanana.
(eme)
