MANUFAHI, STLTIMORLESTE.com – Relasiona ho lansamentu projetu atribui Sertifikadu Prospesaun ba Kompanhia Tivan husi Australia, atu halo peskiza no esplora Minerais Metalikus iha Postu Administrativu Turiskai, nunee Primeiru Ministru Kay Rala Xanana Gusmão husu joven sira iha Turiskai kria unidade hadook aan husi problema arte marsial sira hodi simu dezenvolvimentu.
Primeiru Ministru, Kay Rala Xanana Gusmão hateten, joven sira tenke hakuak malu, ba Turiskai oan sira husu labele halo problema liu-liu arte marsial sira.
“Husu mos ba joven sira hakuak malu nafatin ba, hau lakohi rona arte marsial iha Turiskai baku malu, too fali mestre balu tanba grupu ida alunus tenke tama hotu mak ba eskola, hau lakohi rona iha Turiskai iha Arte Marsial,” hateten Primeiru Ministru, Kay Rala Xanana Gusmão bainhira partisia serimonia atribui Sertifikadu Prospesaun ba Kompanhia Tivan husi Australia, atu halo peskiza no esplora Minerais Metalikus iha Postu Administrativu Turiskai, Munisipiu Manufahi.
Xefe Governu hatete, balu ba sae sintu iha fatin seluk mai fali haree malu la diak, karik ida sala bolu malu hadia, ita mesak maun alin, nunee mos Turiskai oan sira hadomi malu nafatin, hakuak malu ba tuir katuas sira nian.
Nia salienta tan katak, Turiskai nia oan sira ita atu tama ona ba presesu dezenvolve rai nee, maibe sei iha areas oin-oin deit iha agrikultura, edukasaun, saùde, tanba nee husu ba imi, karik imi ba iha universidade, estuda buat neebe mak rai nee presiza, nunee eskola hotu fila mai dezenvolve idak-idak nia rai.
Primeiru Ministru hatutan, la kleur tan sei halo desentralizasaun hodi fo kbiit ba Prezidente Monisipiu sira, ba Autoridade Postu Administrativu sira hodi halao dezenvolvimentu iha area rural sira.
“La kleur hau sei lao haleu Timor kona-ba desentralizasaun fo kbiit ba munisipiu ba autoridades iha Postu Administrativu hodi ita book daudaun, tanba ba hotu Governu sentral, suku atus haat resin ita atu fo uluk ida neebe, mas kuandu hatun ona ita sei buka diskuti hamutuk saida mak presiza no ita haree liu ida neebe mak prioridade,” tenik nia.
Nia dehan, Governu iha planu barak, liu-liu iha aaùde, edukasaun, agrikutura, ohin loron Timor Leste iha ona faze oinsa esforsu atu dudu ekonomia.
Tanba nee, Xanana rekonhese katak, oras nee ita hetan netik osan husi ita nia Mina Bayu Undang, nunee mak agora ita atu hadia fila fali hanesan mineriu sira iha rai maran, atu nunee ikus mai karik hetan osan ita sei investe iha fundu nasional hodi bele hadia ekonomia komunidade sira nian.
(EST 3)
