DILI, STLTIMORLESTE.com – Primeiru Ministru (PM), Kay Rala Xanana Gusmão husu Timoroan sira lalika rona lia falsu neebe hakarak fahe Timoroan sira.
Lia hirak nee Xefe Governu deklara hafoin remata partisipa iha serimonia isar Bandeira, hodi selebra proklamasaun unilateral independensia ba dala-49 neebe halao iha kampu prizaun, Kamea Bekora, Kinta (28/11/2024).
“Prezidente Republika nia diskursu naruk neebe nia hatoo hela Oekusi, nia husu liu-liu ba joven sira atu haluha tia buat neebe akontese iha pasadu hodi ita hamutuk iha armonia nia laran atu hateke ba povu no rai ida nee. Nee duni lalika se tilun ba liafuan oin-oin neebe hakarak fahe ita,” hatete PM, Kay Rala Xanana Gusmão.
Xefe Governu hatutan, serimonia proklamasaun unilateral independensia ba dala-49 neebe halao iha Rejiaun Administrativa Espesial Oekusi Ambeno (RAEOA) hetan partisipasaun husi reprezentante sira husi Governu Jakarta, tanba Prezidente Republika Indonezia, Prabowo Subianto haruka membru governu mai ho jenerais balu inklui reprezentante sira husi nasaun Malazia mos partisipa iha serimonia importante nee.
“Nee hatudu katak ema fo konfiansa ba ita rain, rai ida neebe hatene haluha tia buat hotu neebe akontese iha pasadu hodi hahu agora kria armonia no amizade hodi hotu-hotu koalia ba malu oinsa dezenvolve rai ida nee no povu nia moris,” hatete Xefe Governu.
(alb)
