ATAURO, STLTIMORLESTE.com – Primeiru Ministru (PM), Kay Rala Xanana Gusmão (PM) hamutuk ho Membru IX Governu Konstitusional halo inaugurasaun ba edifisiu foun ba Balkaun Uniku iha Autoridade Administrativu Atauro.
Iha ambitu inaugurasaun ba edifisiu foun ba Balkaun Uniku, PM Xanana Gusmão hatoo felisitasaun ba kontribuisaun husi parte hotu nomos organizasaun internasional sira neebe mak partisipa iha serimonia inaugurasun nee.
“Hau felisita ita boot sira nia servisu liu-liu Balkaun Uniku nian, ho buat sira nee hotu hau felisita mos kontribuisaun husi Ministeriu Justisa nomos husi instituisaun estadu nian sira seluk, felisita mos organizasaun internasionais neebe mak ohin mai partisipa iha serimonia ida nee,” katak PM liu husi nia diakursu iha Suku Maumeta, Sesta (14/03/2025).
Governante nee haktuir, Balkaun Uniku nee sei fasilita komunidade sira hodi asesu ba halo pasaporte, bilhete identidade, bainhira too ona iha dijitalizasaun nee, ba sira neebe mak servisu iha nee tenke halo servisu ho diak.
Iha biban hanesan, Ministru Justisa, Sergio Hornai haktuir, IX Governu Konstitusional hamutuk ho Ministeriu Justisa no Ministeriu ESTATAL lori administrasaun justisa hakbesik liu tan mai Atauro, nunee komunidade sira bele trata sira nia dokumentus ho fasil no lais.
Objetivu prinsipal mak atu hametin demokrasia no hametin administrasaun ida neebe mak efikaz no efisiente liu ba populasaun sira, banhira sira hakarak mai trata sira ninia dokumentus.
“Lori sistema dijitalizasaun neebe mak ita lori mai iha Atauro nomos munisipiu sira neebe ita atu estabelese Balkaun Uniku para bele atende daudaun ona komunidade sira ba iha interese lejitimu ba iha identidade pesoal,” katak Ministru Justisa.
Aleinde nee, Prezidente Autoridade Atauro, Matias Belo lori komunidade Atauro nia naran hatoo sentimentu orgulhu ba prezensa Balkaun Uniku iha Atauro neebe hatutan servisu Governu sental nian mai Autoridade Administrativu Atauro, liu-liu atendimentu dokumentus ba sidadaun sira nian ho prezensa Balkaun Uniku nia nee sei lori servisu atendimentu besik liu tan ba komunidade.
“Komunidade barak liu mak hela iha area remotas, neebe difisil tebes asesu ba estrada labele mai direita iha nee, bele lori servisu nee hakbesik liu tan ba komunidade neebe mak Governu prepara ona,” katak nia.
Enkuantu Bulkaun Uniku Atauro harii laos ho orsamentu kombinadu ida husi MAE no UNDP, maibe orsamentu nee husi Fundu Espesial Dezenvolvimentu Atauro (FEDA) ba projetu rua ba tinan 2024 nian hamutuk US$ 2,723,606 milhões.
(EST 2)
