AILEU, STLTIMORLESTE.com – Primeiru Ministru (PM) Kay Rala Xanana Gusmão halao inaugurasaun ba edifisiu Eskola Filial Concin, iha Aldeia Concin, Suku Bocolelo, Postu Administrativu Laulara, Munisipiu Aileu.
Eskola Filial nee konstrui husi familia Kwan husi Batam – Indonezia no Timor-Leste ho grupu voluntariu The Best in Town durante fulan tolu nia laran.
Edifisiu nee iha sala hamutuk tolu ba alunu sira atu utiliza ba prosesu aprendizajen, iha mos sala ida ba profesores sira kompleta ho fasilidade hanesan sofa, armariu atu bele rai livru sira, meza ho kadeira, fasilidade sanitaria no seluk tan.
Primeiru Ministru agradese ba familia husi Rudy Kwan neebe ho konsiensia tomak hakarak atu tulun no partisipa direta iha dezenvolvimentu Timor-Leste nian espesialmente iha area edukasaun nian.
“Hau mai iha nee tanba iha buat importante tebtebes neebe ita tomak apresia. Hau iha nee atu espresa apresia boot tebtebes ba maun Rudy Kwan ho nia familia. Ida-nee hatudu laos deit fuan boot maibe hatudu konsiensia tomak atu partisipa iha dezenvolvimentu rai ida nee nian,” hatete PM Xanana liu husi nota komunikadu neebe STL asesu husi media GPM, Sabadu (07/02/2026).
Prezensa Xefe Governu nian iha serimonia nee atu hatudu ba Rudy Kwan ho familia katak, Governu rekonhese tanba konsege halo eskola ida-nee. Aleinde nee, Rudy Kwan mos halo ona asaun karitativa barak iha territoriu Timor-Leste hanesan harii uma ba maluk vulneravel sira no mos ba inan faluk sira, oferese mobiliariu eskola sira, apoia atividade desportu no seluk tan.
Ida-nee mos Rudy Kwan hatudu ba Timoan-sira neebe sai boot ona nee, dalaruma eskola boot ona hetan tiha grau akademiku boboot, hanoin deit atu hetan servisu no bainhira hetan tiha servisu maibe la hanoin kona-ba buat sira-nee, hanoin deit ba-aan rasik.
“Ezemplu husi familia Rudy Kwan nee sai hanesan ezemplu diak tebtebes, tanba nee hau lori Governu nia naran agradese ba familia ida-nee,” PM Xanana agradese.
Iha fatin hanesan, Rudy Kwan lori nia maun alin nain-haat nia naran hakarak agradese ba Primeiru Ministru no membru Governu balun inklui autoridade munisipal no autoridade lokal neebe partisipa iha serimonia entrega eskola nee ba populasaun iha Aileu espesialmente iha Concin.
Agradese tebes mos ba grupu voluntariu sira husi The Best in Town neebe mak durante nee servisu makaas hodi ajuda familia ida-nee atu konstrui eskola ba maluk sira iha fatin refere.
Familia Rudy Kwan hamutuk maun alin nain haat mai husi Batam – Indonezia no hela iha Timor-Leste durante tinan 21 ona.
“Ami bele hela kleur iha-nee no ami mos konsidera ona Timor-Leste hanesan ami-nia uma segundu. Tanba nee ami hadomi rai ida-nee no ami mos hadomi tebes povu Timor-Leste. Ami konsidera katak, Timor-Leste mos hanesan mahon ida ba ami no ami konsidera ona povu rai ida nee hanesan ami-nia familia rasik. Ho prinsipiu ida-nee maka durante nee ami esfrosu hela atu fo kontribuisaun kiik balun husi buat neebe ami bele ba maluk Timoroan sira neebe presiza,” Rudy Kwan hateten.
Familia nee mos konsege loke estrada iha area rural balun hanesan iha Viqueque, konstrui uma ba ema kbiit laek sira inklui faluk sira, ajuda mobiliariu ba eskola sira no mos apoia atividade desportu iha rai laran.
Rudy Kwan kaer metin lia-fuan neebe mak Primeiru-Ministru koalia bebeik dehan katak labarik sira mak futuru nasaun nian.
Tanba nee, bainhira simu proposta ida husi komunidade iha-nee atu harii edifisiu eskola nee, Rudy Kwan ho familia konkorda kedan atu kontribui no koordena kedan ho Ministeriu Edukasaun, autoridade lokal no komunidade tomak atu haree prosesu tomak oinsa bele hetan rai ida, ikus-mai komunidade ida oferese ninia rai neebe ohin loron utiliza daudaun.
Atualmente Rudy Kwan mos hetan konfiansa hodi asumi kargu hanesan Prezidente Federasaun Atletizmu Defisiensia Timor-Leste.
Ministra Edukasaun, Dulce de Jesus agradese ba familia nee tanba iha Timor laran tomak foin primeira-vez inaugura eskola ida, neebe familia ida mak konstrui rasik ho sira-nia hakarak rasik atu oferese ba povu rai ida-nee nian.
“Hau lori Ministeriu Edukasaun nia naran husi nasional too munisipiu hakarak agradese wain ba ita boot sira nia laran luak hodi oferese edifisiu ida-nee ba populasaun iha Concin. Ami selu labele,” Ministra nee agradese.
Ministra mos husu ba profesores sira no alunu sira atu utiliza didiak edifisiu nee hodi estuda bele sai matenek iha futuru. Apela ba autoridade lokal ho inan aman sira atu hamutuk tau-matan ba edifisiu nee hodi bele utiliza ba tempu naruk.
Prezidente Autoridade Munisipal Aileu, João Bosco dos Santos mos lori Autoridade Munisipiu nia naran agradese ba apoiu neebe familia ida-nee oferese ba populasaun Aileu espesialmente ba Suku Bocolelo.
“Ida-nee ezemplu ida neebe diak tebtebes ba ita tomak, liu-liu ba emprezariu lokal sira atu kontribui ba dezenvolvimentu nasaun nian iha area hotu-hotu,” João Bosco dos Santos hateten.
Oras-nee daudaun estudante hamutuk nain-113 mak halao aprendizazen iha eskola filial nee hahu husi primeiru anu too kintu anu, ho profesores nain-haat.
(alb)
