DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu Indonezia aseita ona halo negosiasaun fronteira maritima.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta, iha Palasiu Prezidensial Bairo Pite, Kinta (09/01/2025).
PM Xanana hatete, oras nee daudaun Governu Indonezia aseita ona atu halo negosiasaun ba fronteira maritima, nunee bele halo kontrola ba peska ilegal sira neebe lao hela iha tasi mane.
“Hakarak informa mos katak, husi Governu Indonezia fo hatene ona, sira aseita halo negosiasaun maritima, uluk nee tos, mais agora mezmu ho Naktuka seidauk karik mos Fronteira Oekusi nia nee husi Naktuka mai deit baliza, ida mai iha laliga malu fali ho Motain too Salele, neebe sira aseita ida nee be karik tinan ida nee mos atu hahu, ita haree took tanba ita presiza, presiza para kontrola peska ilegal neebe lao hela iha ita nia tasi mane,” dehan PM Xanana.
PM hatete, Timor iha tasi feto no tasi mane, sira rua hola malu iha oan, no tasi oan mak iha Oekusi.
Iha biban nee, Primeiru Ministru mos imforma kona-ba atividade neebe mak sei halo iha fulan tolu nia laran nee ba iha Prezidente Republika Jose Ramos Horta.
(eme)
