DILI, STLTIMORLESTE.com – Primeiru Ministru (PM), Kay Rala Xanana Gusmão informa Orsamentu Jeral Estadu (OJE) 2025 neebe pasa ona iha Parlamentu Nasional ba Prezidente Republika (PR), Jose Ramos Horta hodi promulga.
Bainhira remata halao enkontru, Primeiru Ministru Kay Rala Xanana Gusmão ba jornalista sira iha Palasiu Prezidensial, Nicolau Lobato, Bairo Pite, Dili, Kinta (21/11/2024) hatete, semanalmente halo enkontru ho Prezidente Republika hodi hatoo saida mak akontese iha Governu.
No ohin mai informa kona-ba Orsamentu Jeral Estadu neebe pasa ona ba Prezidente Republika, Semana oin Prezidente sei promulga.
“Hau mai informa deit ba Prezidente Republika katak, orsamentu liu tiha ona karik laos ohin no aban semana mai Prezidente promulga tiha ona,” katak PM, Xanana.
Primeiru Ministru hatete, iha enkontru nee Prezidente Republika Jose Ramos Horta husu preparasaun kona-ba 28 Novembru neebe realiza iha RAEOA.
“Ohin dader iha Konselhu Ministru ami halo rezolusaun ida para halo hanesan sistema ida kooperasaun trabalhu entre F-FDTL no PNTL, para fo seguransa hanesan mos uluk Papa mai, neebe informa mos ba Prezidente,” hateten Xefe Governu.
Xefe Governu hatete, iha komemorasaun 28 Novembru Prezidente Republika konvida jenerais Indonezia neebe reformado hotu ona, se karik hakarak bele mai, no Governu preparadu hodi simu sira hanesan maun alin hanesan amigu hodi partisipa selebrasaun 28 Novembru iha Oekusi.
“Naran sira nee depois mak bele lee, tanba seidauk hatene balun mai balun seidauk hatene, tanba seidauk responde, no Prezidente Indonezia Prabowo mos PR Ramos konvida, loron ida hau hasoru hau entrega karta, nia dehan 28 nia la konsege mai bele mai iha tinan mai nee nia kala haruka ema ruma mai,” katak PM, Xanana.
(eme)
