DILI, STLTIMORLESTE.com – Primeiru Ministru (PM), Kay Rala Xanana Gusmão hateten, joven sira husi 12 Novembru hanorin ita hotu atu lao hamutuk, maibe wainhira temi kona-ba interese nasional ita labele fahe malu beibeik.
Liafuan nee hatoo husi Primeiru Ministru (PM) Kay Rala Xanana Gusmão ba jornalista sira hafoin partisipa iha selebrasaun loron 12 Novembru ba dala 34, iha Santa Krus, Dili, Kuarta (22/11/2025).
“Atu defende ukun aan, joven sira husi 12 Novembru hanorin ita hotu atu lao hamutuk, interese nasional aas liu interese kada partidu ida nia, maibe ho nia direitu ho nia dever kona-ba interese nasional hotu-hotu hamutuk, ida nee mak joven 12 Novembru hanorin mai ita,” dehan PM Xanana.
Nia dehan, iha istoria 12 Novembru, joven sira neebe mak luta ba ukun aan, lori mai ita kuandu temi buat ruma kona-ba interese nasional, ita labele fahe malu ba beibeik.
Primeiru Minsitru (PM), Kay Rala Xanana Gusmão mos husu ba komisaun 12 Novembru atu hakerek istoria 12 Novembru nia, hodi fahe ba eskola sira hotu.
“Tanba nee mak hau husu ba komisaun 12 Novembru atu hakerek istoria 12 Novembru nia hodi fahe ba eskola sira hotu,” dehan Primeiru Ministru, Xanana.
Jornalista: EST 1
Editor: Xisto Mendonça
