DILI, STLTIMORLESTE.com – Primeiru Ministru (PM), Kay Rala Xanana Gusmão konsidera kontribuisaun emprezariu Timoroan sira importante tebes ba progressu dezenvolvimentu nasaun nian.
Tanba nee, Primeiru Ministru apela ba emprezariu Timoroan sira atu kontribui bá dezenvolvimentu nasaun ne’e ho laran tomak.
Maske nunee, PM Xanana observa katak, emprezariu Timoroan balu liu-liu sira neebe hetan projetu husi Governu buka de’it atu hetan osan boot, maibe servisu la ho kualidade too balu abandona projetu.
“Husu ba imi atu halo buat di’ak. Saida mak hakarak kontribui tenke halo duni no halo ho didi’ak ba konstrusaun Estadu ida nee,” PM Xanana hateten iha enkontru ho Emprezáriu Nasional sira neebe organiza husi Ministeriu Obras Publika iha Salaun Delta Nova, Kinta (27/02/2025).
Xefe Governu kontente ohin bele halibur malu atu haree ba Estadu nee lao diak ka lae, haree fila-fali seitor privadu ho Governu koopera ho diak ka lae, tanba konstrusaun nasaun nee katak hakbiit sosiedade no hakbiit setor privadu.
“Setor privadu nee importante, tanba nia mak kria mos empregu ba sidadaun sira hodi ajuda Estadu ida nee,” PM Xanana hateten.
Nunee apela ba emprezariu sira atu kontinua kapasita aan, kontinua dezenvolve aan hodi kontribui diak liu tan dezenvolvimentu nasaun nian.
Iha fatin hanesan, Ministru Obras Públika (MOP), Samuel Marçal fo atensaun ba emprezariu sira atu servisu ho laran ba rai ida nee, tanba Governu halo ona planu oin-oin, maibe setor privadu tenke forte hodi bele kontribui no mós loke kampu trabalhu ba joven sira.
Husu ba setor privadu hotu-hotu katak, sai emprezariu laos hanoin deit atu iha osan barak, maibe primeiru mak oinsa iha vontade servisu no tinan ida nee ba oin MOP sei haree hodi halo avaliasaun rigorozu ba empreza sira neebe mak iha duni vontade atu servisu hodi kontribui ba rai ida nee.
“Tanba nee, iha Primeiru Ministru nia oin hau husu ba imi ho haraik aan tebes-tebes katak, bainhira Governu fo fiar ba imi atu halo servisu ba nasaun nee, tenke servisu ho didiak, ho vontade tomak, dezenvolve imi nia aan. Estadu presiza tebes-tebes imi hotu ninia apoiu, nunee mai ita hamutuk hodi dezenvolve Timor nee ba oin liu tan,” Ministru hateten.
Marka Prezensa iha enkontru nee Prezidente CCI-TL, Jorge Serrano ho estrutura no mos estrutura munisipal sira inklui emprezariu nasional sira.
Iha oportunidade nee mos emprezariu sira aprezenta difikuldade neebe durante nee enfrenta no husu ba Governu atu hamutuk buka solusaun.
(alb)
