DILI, STLTIMORLESTE.com – Primeiru Ministru (PM), Kay Rala Xanana Gusmão hatete, nia parte konkorda bainhira deputadu sira konkorda hasai lei pensaun vitalisia.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta nee (24/07/2025).
Primeiru Ministru Kay Rala Xanana Gusmão hatete, se deputadu sira iha Parlamentu Nasionál konkorda hamoos lei pensaun vitalisia, PM konkorda.
Foin lalais deputadu sira balun iha Parlamentu Nasionál hatete sei koalia ho deputadu husi bankada iha Parlamentu Nasional atu bele hasai lei pensaun vitilisia, oinsa PM nia hanoin ba ida nee, hatan ba kestaun nee Primeiru Ministru hatete, se mak foti sae atu hasai lei pensaun vitalisia.
“Se mak foti sae ida nee, se mak foti ida nee,” katak Primeiru Ministru Kay Rala Xanana Gusmão.
Foin lalais deputadu husi Bankada CNRT, Deputadu Duarte Nunes mak hatete katak sei kordena ho deputadu sira iha Parlamentu Nasional atu bele hasai tiha pensaun vitalisia, hatan ba kestaun nee PM hatete, ida nee laiha problema.
“No Problem diak liu tan, no problem,” dehan Primeiru Ministru.
Ho stegman husi deputadu husi Bankada CNRT nia atu halo koordenasaun ho deputadu neebe hetan asentu iha parlamentu atu halakon lei pensaun vitalisia nee Primeiru Ministru aseita ka lae? Hatan ba kestaun nee Primeiru Ministru hatete, PM ema ida mak nia.
“Hau ema ida, hau nia suara ema ida nia, ita boot nia suara boot, hau nia lian ema ida nia, konforme maioria hau la kontra,” katak PM xanana.
Sekretariu Jeral Partidu FRETILIN, Mari Alkatiri hatete, nia aseita ho deklarasaun husi Bankada CNRT atu halakon Pensaun Vitalisia ba eis titulares sira.
“Hau prontu, hau prontu mais keta kolia hanesan nee atu buka votus deit karik,” hatete Mari Alkatiri ba jornalista sira iha salaun Kanosa Has Laran, Manleuana, Kuarta (23/07/2025).
Alkatiri afirma, nia aseita ho deklarasaun Bankada Partidu CNRT atu halakon lei Pensaun Vitalisia nee maibe tenke tau iha pratika no labele halo fali deklarasaun ida atu buka votus iha eleisaun tuir mai.
Foin lalais Xefe Bankada Partidu CNRT, Duarte Nunes hateten, sei konsulta ho lider bankada iha Parlamentu Nasional atu diskute lei Pensaun Vitalisia.
“Pensaun Vitalisia nee ba hotu-hotu, se hotu-hotu agora ita tama mai hotu-hotu konkorda, hau lee iha media, hau rezista tiha iha hau nia ajenda, hau sei konsulta iha líder Bankada mak hotu-hotu konkorda, hau konsulta ho partidu ita avansa,” hateten Duarte Nunes.
Duarte rezeita deklarasaun husi Partidu FRETILIN neebe dun Bankada Partidu CNRT mak lakohi diskute lei Pensaun Vitalisia nee, maibe atu diskute lei Pensaun Vitalisia nee presiza Deputadu hotu-hotu nia kontribuisaun.
(eme)
