DILI, STLTIMORLESTE.com – Primeiru Ministru (PM), Kay Rala Xanana Gusmão lamenta ho hahalok sidadaun Timoroan balu neebe lori kilat musan tama mai iha Fronteira Batugade, haree ba hahalok nee Xefe Governu halao vizita derrepente ba Kuartel Jeral Polisia Nasional Timor Leste (PNTL), hodi fo xamada atensaun ba Komando PNTL atu reforsa servisu seguransa iha linha fronteira.
“Ohin mai vizita Komando Jeral PNTL, tanba iha fronteira foin daudaun Timoroan balu tama mai ho kilat musan. Buat sira nee hotu ida nee seguransa Estadu nian, tanba nee mak hau mai iha nee laos hanesan apresia, maibe ita fo atensaun deit kontinua nafatin, tanba seguransa Estadu nian nee importante tebes-tebes. Tanba hau mai nee atu kontaktu Komando PNTL atu reforsa nafatin servisu iha fronteira atu garante seguransa iha ita nian rain,” Primeiru Ministru (PM), Kay Rala Xanana Gusmão ba jornalista sira iha Kuartel Jeral PNTL Kaikoli, Segunda (13/01/2025).
Hafoin enkontru ho Komandante Jeral PNTL, Komisariu Jeral Polisia Henrique da Costa no Segundu Komandante Jeral PNTL, Komisariu Polisia Pedro Belo iha nia knaar. Xefe Governu nee husu ba Komando PNTL atu tau atensaun seriu ba asuntu nee, hodi fortifika seguransa iha linha Fronteira, liu-liu pontu entrada sira atu nunee ema labele naran lori kilat musan tama no sai iha pontu entrada sira.
Iha fatin hanesan, Komandante Jeral PNTL, Komisariu Jeral Polisia Henrique da Costa hatete, loos duni iha Domingu horiseik sidadaun Timoroan ida lori kilat musan tama mai Fronteira Batugade, hafoin partisipa serimonia fúnebre familia nian iha NTT, Indonezia.
“Los duni horiseik loraik ita hetan informasaun servisu sira iha Fronteira katak, joven Timoroan ida husi Indonezia tama mai Fronteira Batugade, joven nee ba Indonezia ba tuir funebre ninia familia iha NTT, Indonezia, bainhira nia fila mai ita identifika makina X-Ray kapta katak, iha nia pasta laran nee bala. Depois halo verifikasaun loos duni iha bala iha pasta laran, ita nia parte servisu Alfandega entrega kedan ba polisia hodi halo prosesu investigasaun,” dehan Komisariu Jeral Polisia, Henrique.
Komisariu Jeral Polisia, Henrique hatutan, Departementu Investigasaun Kriminal Nasional too kedan ba iha fatin hodi asegra kedan suspeitu.
“Suspeitu nee ita lori kedan iha Departamentu Investigasaun Kriminal nia fatin hodi halo prosesu, hafoin halo tiha prosesu ba suspeitu ita detein kedan suspeitu nee iha sela detensaun Departamentu Investigasaun Komando Jeral PNTL durante 72 oras molok submete ba primeira interogatoriu,” nia esplika.
Komandante Jeral PNTL nee hatete, iha prosesu inisial ba suspeitu katak nia nee elementu polisia nia oan.
Entretantu tuir informasuan neebe jornalista STL asesu iha terenu katak, iha Domingu (12/1/2025) horiseik, tuku 11:15 otl, Servisu Nasional Intelejensia (SNI) no Alfandega asegura suspeitu nain rua ho inisial GdSM no OLSG, tanba deskonfia lori kilat musan ualu tama mai Fronteira Batugade, hafoin fila husi NTT, Indonezia.
Suspeitu nain rua nee Alfandega no SNI asegura hafoin makina X-Ray deteta katak, sidadaun nain rua nee lori bala musan ualu, hafoin asegura tiha suspeitu nain 2 nee asegura mos telefone ida.
(jen)
