DILI, STLTIMORLESTE.com – Primeiru Ministru (PM), Kay Rala Xanana Gusmão hatete, eskola seminariu Dare nomos Soibada neebe harii husi Igreja Katolika hanorin husi padre sira dedika joven barak sai lider nasional.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolao Lobato, Bairo Pite, Kinta (20/03/2025).
Iha biban nee, Primeiru Ministru dehan, Universidade Catolica Timorense (UCT) bele sai ezemplu ida ba kualidade hanorin, PM fo lembra ba UCT labele kompete malu ho universidade barak-barak iha Timor nee, ou ida neeba graduasaun nee tinan ida nee 1.257 ida seluk dehan ou liu ami 1.858 nee labele.
PM dehan, kada tinan bele fo graduadu finalista laiha problema, importante mak sai mai sai ema neebe preparadu joven neebe preparadu atu haree ba rai nee, komprende rai nee, hadomi rai nee para servi.
“Ezemplu ida mak iha tempu português iha ami nia tempu eskola sira neebe temi selalu makan asam (SMA) nee mak seminariu iha Dare Timor tomak, so 60 ital komesa funu ona iha Afrika sira mak halo netik ida nee no ida neeba lae, ensinu Katolika mak halo eskola sira nee, padre, madre sira mak hanorin no mestre sira nee sai husi Soibada, husi Soibada sai mos lider balu tempu neeba nia, balu mai Liseu balu ba seminariu, neebe hau husu dehan ba sira haree tuir istoria ezemplu neebe Soibada fo formasaun ba Timoroan sira neebe makan Asam (SMA) deit mos matenek hotu ona,” katak PM Xanana.
Primeiru Ministru dehan, labele haree numeru deit, katak iha universidade nee numeru barak liu hodi halo kompetisaun, universidade ida nee ema barak los no ida neeba ema oituan deit, ikus sai graduasaun Google la hanorin ho diak.
“Ita husu boot no dezeju katak Universidade Katolika bele sai ezemplu ida para prepara lider foun iha futuru, horiseik mos ami diskute iha Konselhu Ministru atu haree fila fali ba estatutu organika UNTL nia kapaas hodi hadia daudaun ona atu aumenta kualidade de ensinu, ami seidauk aprova sei iha diskusaun nia laran, ida nee atu hatudu katak labele buka numeru graduadu deit katak ida neeba mak diak, lae, tenke buka se mak sai husi neeba nee matenek hodi hanoin luan hodi lori rai nee ba oin,” dehan PM Xanana.
Xefe Governu dehan, presiza joven ba futuru nasaun nee, tanba ohin loron lider tuan sira mos komesa idade ba daudaun ona no foinsae sira mos balu komesa fuuk mutin ona, tanba nee presiza prepara joven foinsae ho matenek kualidade nunee aban bainrua bele lori ba oin ho prosperu.
(eme)
