AINARO, STLTIMORLESTE.com – Konselleiru Organizasaun Klibur Munisipiu Ainaro konsidera, Primeiru Ministru (PM) Kay Rala Xanana Gusmão lider neebe fuan boot lidera povu no nasaun.
Iha ambitu vizita ofisial Primeiru Ministru nian tuir programa “Haree besik servisu munisipal husi rezultadu avaliasaun ba kondisaun manima” iha Munisipiu Ainaro neebe realiza iha loron 10 Marsu nee, iha salaun Parokia Nossa Senhora de Fátima Ainaro, Konsilheru Organizasaun Klibur Abílio Magno agradese ba Governu atual neebe lideradu husi Kay Rala Xanana Gusmão, mezmu hetan kritikas husi publiku kona-ba implementasaun programa Governu iha territoriu nasional, maibe Xefe Governu ho kalma nafatin krese no implementa dezenvolvimentu, tanba hakarak povu asesu infraestrutura bazika neebe dezenvolve.
“Ami agradese tebes ba maun boot Xanana neebe lidera Governu ida nee ho fuan boot ohin hamrik lidera povu liu liu ba Munisipiu nian agora atu realiza oan dezenvolvimentu,” Konsilheru Organizasaun Klibur Abílio Magno espresa iha sesaun husu no hatan iha salaun Parokia Nossa Senhora de Fátima Ainaro, Tersa (10/03/2026).
Abílio konsiente, asaun Primeiru Ministru Kay Rala Xanana neebe ho fuan boot lidera nasaun nuudar meius ida ba membru Governu too Autoridade Munisipal atu banati tuir hahalok Primeiru Ministru nian hodi lidera povu no nasaun.
Nia argumenta, hanesan jovem foinsae emprosionadu tebes ba Primeiru Kay Rala Xanana nia hahalok neebe ho simplisidade hakbesik aan ba nia povu liu liu idozu no idoza sira neebe konsidera erois liberta nasaun.
“Iha tempu oin mai ami sei la husik maun boot, tanba nee kuidadu nafatin maun boot nia saude graça Maromak horik nafatin para ukun rai ida nee hatudu nafatin para povu nee bele sente foti nasaun nee,” Abílio espresa.
Iha sorin seluk, komunidade husi Suku Mausiga, Filomeno de Araújo akresenta, asaun hakraik aan neebe Kay Rala Xanana hatudu ba nia povu espresa husi akontese pasadu nian neebe akontese iha tempu okupasaun Indonezia nian povu hetan terus no susar too Timor ukun aan, maibe husu atu marka istoria ida iha foho kablake tutun hodi sai memoria ba jerasaun foun tuir mai.
“Uluk iha kablake maun boot dehan hanesan nee, kablake tarutu rai nakdoko, ohin loron maun boot fila mai hau rekomenda tau netik sinal ruma iha kablake tutun hodi nunee ita hateke ba Ramelau, tanba liga ba turizmu ita sai kablake aban bainrua sai area turizmu, agora labarik sira eskola iha area turizmu barak, maibe kablake sei nakukun nafatin,” Filomeno de Araújo haktuir.
Filomeno la esplika klean segredu entre foho kablake nian neebe iha tempu rezistensia Kay Rala Xanana Gusmão hateten, kablake taruru rai nakdoko, maibe too ohin loron seidauk iha sinal ida ba futuru sai sitiu turistiku.
Hafoin rona deklarasaun hirak nee, Xefe Governu simu ho matan been hodi hatan “Tan imi mak ukun aan hadia buat hotu hotu iha nee obrigadu,” Primeiru Ministru hateten ho matan been neebe povu Ainaro sai testamunha.
(tom)
