DILI, STLTIMORLESTE.com – Primeiru Ministru (PM) Kay Rala Xanana Gusmão hatete, lori nasaun ba oin laos fasil, maibe PM promete tinan 2025, IXGovernu sei halo servisu ho kualidade.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru ho Prezidente Republika José Ramos Horta iha Palasiu Prezidensial Bairo Pite, Kinta (21/11/2024).
Primeiru Ministru hatete, lori nasaun ba oin laos buat ida fasil, maibe Xefe Governu mos hatete ona iha Parlamentu Nasional nomos ba Prezidente Republika katak, iha tinan 2025 IX Governu promete sei halo servisu hotu ho Kualidade.
“Atu lori nasaun nee ba oin laos fasil, difisil mais hau mos dehan ona ba Prezidente Republika, hau temi tiha ona iha Parlamentu Nasional katak, 2025 nee ami sei esforsu aan atu halo buat barak atu tuir orsamentu neebe fo ona, mas halo ho kualidade,” dehan PM Xanana.
Primeiru Ministru promete katak nia sei lao haleu iha Timor laran tomak hodi halo observasaun ba kada Ministeriu sira nia servisu neebe halo iha kada Munisipiu.
“Laos dehan halo deit, halo deit, hau mos promete ona iha Parlamentu Nasional katak hau sei lao haleu Timor kada fulan tolu-tolu, tanba hau hatene kada ministrriu ida atu halo saida iha nee, neeba haree tuir hodi bolu atensaun ba malu hanesan nee mos hau husu ba Parlamentu Nasional katak sira halo fiskalizasaun beibeik, karik mak sira haree buat seidauk halo bolu ami ba responde, karik mak halo la diak bolu ami atu responde ita atu kurije,” katak Xefe Governu.
Xefe Governu mos husu nafatin ba iha Parlamentu Nasional halo fiskalizasaun ba Servisu neebe IX Governu halo, karik iha falhansu ruma bele hatoo nunee buka hadia hodi fo benefisia ba povu.
“Tanba atu halo buat ruma karik laos ba ita rasik, mas ba nasaun no ba povu neebe ho tempu ida badak hanesan nee, semana rua kedas iha Parlamentu Nasional neebe Prezidente Republika dehan hau hatene ita boot kolen hela.” Katak nia.
Nia hatutan, IX Governu Konstitusional simu falhansu hotu-hotu no simu mos kritika nunee bele hadia iha futuru, nunee bele fo rezultadu diak tuir orsamentu kada Ministeriu nia.
(eme)
