DILI, STLTIMORLESTE.com – Primeiru Ministru (PM), Kay Rala Xanana Gusmão hatete, mandatu Prezidente Rejiaun Autoridade Administrativa Espesial Oekusi Ambeno (RAEOA), Regio da Crus Salu remata ona, no daudaun nee moras hela fuan halo tratamentu iha Hospital Nasional Guido Valadares (HNGV).
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta, iha Palasiu Prezidensial Nicolau Lobato, Bairo Pite, Kinta nee (26/03/2026).
“Mandatu hotu ona, nia moras hela, ohin nia moras hela, antes hau mai hau halai lalais ba HNGV, nia problema fuan, depois dehan hau sei ba haree tan nia, ida nee mos informa ba Prezidente katak iha komisaun ida atu ba haree iha neeba,” dehan Primeiru Ministru.
Mandatu Prezidente RAEOA nia remata ona, karik sei extende ka ou iha ona ema seluk hodi troka atu lidera RAEOA, hatan ba kestaun nee Primeiru Ministru ladun resposta seriu kona-ba perguntas nee.
Aleinde nee foin lalais iha 27 fulan Fevereiru 2026, Prezidente Rejiaun Autoridade Administrativa Espesial Oekusi Ambeno (RAEOA), Regio da Crus Salu fo sai katak, daudaun nee estrutura tranzitoriu RAEOA simu ona karta husi Governu Sentral, kona-ba mandatu tranzitoriu Autoridade atual sei termina iha loron 31 Marsu 2026.
Tanba nee nia afırma, prontu simu dezafíu no promete sei apoia estrutura foun atu kontinua dezenvolve rai ketan Oekusi Ambeno.
Prezidente RAEOA dehan, lalika preokupa ho mudansa ruma, tanba estrutura atual nee tranzitoriu, nee tenkiser, tranzitoriu remata, entaun definitivu, saida mak akontese, karta husi Governu Sentral hau simu ona, katak 31 Marsu 2026 mandatu tranzitoriu atual nee remata.
Antes nee iha reuniaun Konselhu Ministru, Kuarta (27 Agostu 2025), Governu liu husi reuniaun Konselhu Ministru aprova projetu rezolusaun ba ezonera estrutura hahu husi Prezidente RAEOA no membru autoridade Rejiaun Administrativa Espesial Oekusi Ambenu (RAEOA) iha 31 Agostu 2025, maibe remata Governu kontinua extende nafatin too 31 Marsu 2026.
(eme)
