DILI, STLTIMORLESTE.com – Primeiru Ministru (PM), Kay Rala Xanana Gusmão hateten, kontijente forsa tarefa konjunta ba Filipina neeba ajuda ho laran tomak.
“Ami fo fiar tomak ba imi, laos atu foti Timor Leste nia naran atu hatudu katak Timor oan, maibe nuudar Timor oan komprometidu atu ajuda se deit mak presiza. Ajuda ho fuan, ajuda laos dehan ida nee ida neeba lae, maibe ajuda ho laran tomak,” hatete Primeiru Ministru (PM) Kay Rala Xanana Gusmão iha nia intervensaun bainhira halo despedida ho kontinente forsa tarefa konjunta nain 150 neebe sei aranka ba halo misaun umanitária iha Filipina iha Kuartel Jenerál F-FDTL Fatuhada, Tersa (11/11/2025).
Nia husu ba forsa tarefa konjunta neebe atu halo misaun umanitária iha Filipina tenke servisu ho responsabilidade, tenke servisu ajuda povu Filipinu neebe hetan dezastre.
“Imi servisu makaas, kuandu imi servisu makas nee ajuda tebes, imi tenke foer makas. Imi foer nee la buat ida, neebe ami fiar ba imi katak imi ba ho laran tomak ho isin tomak ho imi nia vontade tomak atu servisu atu ajuda sira”, nia esplika.
Xanana husu kuandu kole no moras demais ona, bele fila hodi déskansa.
“Liu-liu imi sira forsas, hodi hatudu iha ASEAN tomak katak estadu laos prepara ami atu funu, maibe prepara ami atu ba halo ajuda umanitariu,” nia informa.
Nia tenik, misaun neebe forsa tarrefa konjunta ba apoia umanitária iha Filipina nee atu hatudu komprimisiu ba rai ida nee katak ba atu ajuda laos ba atu pasiar.
“Imi nia komprimisiu ba rai nee no ba iha misaun ida nee mak ba atu ajuda laos ba atu pasiar.Ba atu halo, ba atu kaer, ba atu hafoer aan. Neebe imi ba imi idak diak reprezenta povu ida nee kole bele kole, mora bele se moras, maibe enkuantu ita bele nee hau hatudu katak ita ba nee laos atu foti Timor Leste nia naran, ita ba nee atu fo apoiu”, nia realsa.
Xefe Governu nee dehan, iha misaun ida nee laos atu foti Timor nia naran buat hanesan nee hasai tiha.
Jornalista: Jeniche da Costa
Editora: Domingas Gomes
