DILI, STLTIMORLESTE.com – Primeiru Ministru (PM), Kay Rala Xanana Gusmão hateten, populasaun iha mundu no Timor Leste triste, tanba lakon ona figura mundial neebe sai hanesan promotor ba Fraternidade Umana.
“Ita hotu-hotu hatene foin lalais nia mai iha nee, nia atrai sarani sira no hasoru malu ho Komunidade Musulmanu sira, liu-liu ukun nain sira husu atu tau matan ba povu nee, tanba povu mak rikusoin, neebe ita hotu lembra nia prezensa iha nee, ita triste hamutuk ho mundu tomak,” hatete Primeiru Ministru, Xanana ba jornalista sira iha Aeroportu Internasional, Nicolau Lobato, Kinta nee (24/04/2025).
Nia hatutan, mundu tomak apresia Papa Francisco ninia dediksaun sira, tanba sempre hakilar kona-ba funu, nia husu ba funu nain sira nee atu hapara funu, tanba ema barak mak sofre husi funu nee, laos deit iha Ukraina maibe foin lalais nee mos antes nia mate nia kolia mos kona-ba gaza.
Ukraina ho Palestina nee direitu international nee aplika deit ba Ukraina maibe la aplika ba Palestina, nee tanba interese rai boot sira nee nian, sira lakohi hatene labarik sira mate hamlaha tanba hahan labele tama.
“Papa iha korajen boot no sempre koalia kona-ba ida nee, Papa mos hanorin sarani sira hotu atu tau matan ba ema neebe kbiit laek, neebe Papa sai ezemplu ida iha igreja nia laran, enves de halo deit misa maibe nia atende sosiedade ninia presiza iha moral politika no buat oin-oin,” hatete Xefe Governu.
Entretantu, Primeiru Ministru, Kay Rala Xanana Gusmão mos husu Timoroan sira atu reza ba Sua Santidade Papa Francisco ninia mate, atu nunee bele hakmatek iha Aman Maromak nia kadunan Santu. No tau matan matan nafatin ba povu Timor Leste nomos tau matan ba rai hotu-hotu neebe mak oras nee sei funu nafatin.
Molok nee Konselhu Ministru halao sorumutu iha Palasiu Governu deside ona dekreta Lutu Nasional iha territoriu Republika Demokratika Timor-Leste tomak, nuudar sinal tristeza ba Sua Santidade Papa Francisco nia mate.
Aleinde nee Ministru Prezidensia Konselhu Ministru (MPKM), Agio Perreira hateten, Periodu Lutu Nasional nee sei hahu iha tuku 10 dader iha loron 22 fulan-Abril no remata iha meia noite iha loron 28 fulan Abril.
“Durante periodu Lutu Nasional, Bandeira Nasional tenke hasae too klaran deit iha edifísiu publiku hotu-hotu inklui embaixada, konsuladu no reprezentasaun sira seluk Estadu nian iha estranjeiru no mos iha roo sira Estadu nian,” hatete MPKM, Agio.
(alb)
