DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Orsamentu Jeral Estadu (OJE) tinan 2025 item balun la ezekuta hotu, nee sai lisaun.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (08/01/2026).
Primeiru Ministu dehan, OJE 2025 item balun la ezekuta hotu, ida nee sai lisaun hodi hadia iha tinan 2026.
Primeiru Ministru hatete, iha meia noite, loron 31 fulan Dezembru tinan 2025 no atu simu tinan foun, loron 1 fulan Janeiru 2026, Governu taka ona Konta Jeral Estadu 2025 nian, maibe iha item balun neebe la konsege ezekuta hotu no fila fali ba Kofre Estadu.
Xefe Governu dehan, ida nee sai hanesan lisaun ida ba Membru Governu sira, atu nunee iha tinan 2026 nee bele ezekuta orsamentu ho diak.
“Hau koalia mos ho prezidente iha meia noite 31 hau ba taka orsamentu estadu haree katak item balun ke la konsege ezekuta hotu, hau mos bolu atensaun katak ida nee sai hanesan lisaun ida, fator ida neebe bele ezije ba Governu atu haree didiak, labele tau osan barak osan naton naton hodi bele ezekuta tiha, problema diak ida mak ita bele asegura hela, tanba osan bele fila ba estadu,” dehan Primeiru Ministru.
Aleinde nee Primeiru Ministru Kay Rala Xanana Gusmão ho Prezidente Republika Jose Ramos halao enkontru koordena prioridade estratejika nasional ba tinan 2026, durante reuniaun nee Primeiru Ministru informa ba Xefe Estadu katak situasaun seguransa jeral iha Timor Leste laran tomak mantein estabel no dame. Maski akontese kazu pontual balun durante tempu festividade iha munisípiu sira hanesan Ermera, Ainaro no Viqueque, Primeiru Ministru garante ba Prezidente katak autoridade sira rezolve ona kazu sira-nee ho efisiensia.
Lider nain rua koalia mos kona-ba ajenda diplomatika nasaun nian, liuliu preparasaun ikus ba vizita ofisial Primeiru Ministru Australia nian, Anthony Albanese, neebe previstu sei akontese iha loron 28 fulan-janeiru. Aleinde nee, analiza mos servisu sira kona-ba prezidensia Timor Leste nian iha CPLP, inklui komemorasaun aniversariu organizasaun nian ba dala 30 iha fulan Julhu tinan nee.
Kona-ba prosesu adezaun Timor Leste nian ba ASEAN, Primeiru Ministru informa ba Prezidente katak Governu kontinua kumpre ho rigorozu prosedimentu no rekezitu tekniku sira husi bloku rejional nian, hodi asegura katak partisipasaun ativa no alina ho objetivu estratejiku nasional, tantu iha nivel ministerial hanesan mos ho tekniku.
Reportajen: Emerenciana Pinto
