DILI, STLTIMORLESTE.com – Primeiru Ministru (PM), Kay Rala Xanana Gusmão hateten, povu Timor Leste (TL) sente lakon no sei la haluha kontribuisaun husi jornalista Australianu Robert Domm ba prosesu luta ba ukun rasik aan.
Jornalista Australianu Robert Domm hakotu iis iha loron 7 Novembru 2025.
Primeiru Ministru espresa sentidu pesar no solidariedade ba Domm nia familia, no rekonhese kontribuisaun boot neebe jornalista ida nee fo ba istoria rezistensia Timor Leste nian.
“Povu Timor Leste sente lakon boot ida. Ami sei la haluha kontribuisaun Robert Domm nian iha tempu luta ba independensia. Nia reportajen hatudu ba mundu kona-ba ita nia sofrimentu no ita nia terus iha tempu okupasaun,” Primeiru Ministru Xanana Gusmão hatete liu husi nota komunikadu neebe STL asesu husi Governu, Domingu (09/11/2025).
Durante tempu rezistensia nian, Robert Domm hatudu korajen no determinasaun boot, hodi konsege, ho ajuda husi rede rezistensia, tama ba abrigu segredu ba area Aubehun, Leolima, Ainaro, iha Setembru 1990, hodi halo entrevista istorika ho Komandante Xanana Gusmão, neebe iha tempu neeba hanesan Comandante Em Chefe FALINTIL.
Reportajen nee, neebe transmite husi Australian Broadcasting Corporation (ABC) liu husi jornalista Sashka Koloff, ho titlu “The interview that changed a nation: 1990 meeting with rebel leader Xanana Gusmão in jungle hideout “Entrevista neebe muda nasaun ida: enkontru iha 1990 ho lider rebelde Xanana Gusmão iha subar-fatin ai-laran”), markadu hanesan momentu istoriku importante tebes iha luta Timor Leste nian.
Impaktu istoriku no legado neebe hela metin too agora entrevista iha tinan 1990 nee hanesan aktu jornalistiku kualidade, neebe hakotu blokeiu informasaun neebe Indonezia impoin iha Timor Leste.
Hatudu ba mundu violasaun direitus umanus neebe akontese iha tempu okupasaun, fo lian ba rezistensia Timoroan no nia luta ba autodeterminasaun, no inspira solidariedade internasional neebe hatoo Timor Leste too ba independensia iha 2002.
Reportajen nee rekonhese hanesan “entrevista neebe muda Timor Leste”, hanesan simbolu rezistensia, solidariedade no poder jornalizmu iha servisu verdade no liberdade.
Governu no povu Timor Leste hatoo omenajen ba memoria Robert Domm, neebe nia servisu jornalistiku kontribui tebes atu povu nia lian too ba mundu tomak. “Nia legado sei hela iha istoria Timor Leste, hanesan testemunha kmanek, solidariedade no kompromisu ba verdade.
Jornalista: Alberto Menezes
Editor: Xisto Mendonça
