DILI, STLTIMORLESTE.com – AIFAESA identifika kompanhia neebe tein hahan iha Hospital Nasionál Guido Valadares (HNGV) liu prazu, Primeiru Ministru, Kay Rala Xanana Gusmão hatete, ida nee presiza hapara kompanhia nee.
Primeiru Ministru, Kay Rala Xanana Gusmão hatoo lia hirak nee ba jornalista sira, bainhira remata halo enkontru ho Prezidente Republika Jose Ramos Horta, iha Palasiu Prezidensial Bairo Pite, Kinta (19/12/2024).
Primeiru Ministru dehan, AIFAESA uza nia dever identifika hetan ona labele nonok, maibe koalia sai nunee bele foti desizaun hapara ou hasai.
“Hasai tiha sira, sira nia dever saida, sira nia dever saida. AIFAESA nia dever saida, kumpri sira nia dever laos deskobre deit nonok ona, multa hasai,” dehan Primeiru Ministru.
Relasiona ho asuntu nee Bankada Partidu FRETILIN iha uma fukun Parlamentu Nasional (PN) husu ba Ministeriu Saude atu foti medida rigorozu hasoru kompanhia balun neebe deskonfia fornese ai-haan dodok ba pasiente sira iha HNGV.
Tuir Deputada Nurima Ribeiro Alkatiri katak, ha fulan hirak liu ba nia kestiona no husu Ministeriu Saude atu tau atensaun ba ai-haan neebe mak kompanhia sira fornese ba pasiente sira iha hospital tanba ai-haan neebe iha la prienxe rekejitus.
(eme)
