DILI, STLTIMORLESTE.com – Primeiru Ministru (PM), Kay Rala Xanana Gusmão dehan, produsaun Greater Sunrise iha Timor Leste (TL) sei lori benefísiu barak liu tan ba nasaun no Timoroan.
Liafuan nee hatoo husi Primeiru Ministru (PM), Kay Rala Xanana Gusmão ba jornalista sira iha Forum Enerjia, Minarai no Negosiu Timor Leste ba dala V iha JL World Metiaut, Dili Segunda (24/11/ 2025).
PM Xanana esplika, estudu sira fo ona luz verde ba projetu Greater Sunrise Field iha TL, garante ho estabelesimentu Projetu Greater Sunrise iha rai laran, bele garantia nasaun nia futuru ba tempu naruk.
“Governu nia pozisaun kona-ba Greater Sunrise sempre klaru, Gas natural husi projetu Greater Sunrise tenke prosesa iha rai maran iha TL, ida nee esensial ba dezenvolvimentu nasional sei fo oportunidade foun ba joven Timoroan sira atu hetan abilidade, partisipa iha industria,” katak Xanana.
Nia fundamenta, aleinde projetu Greater Sunrise, nasaun ne’e mós sei dezenvolve ninia rekursu minerál sira hodi hasa’e kresimentu ekonómiku iha rai laran no sei kria mós oportunidade empregu ba Timoroan sira no oportunidade investimentu ba investidór sira.
“Garante katak Greater Sunrise hamosu nafatin iha TL no apoia konstrusaun nasaun nian, sei hametin seguransa enerjetika, apoia industria no kria empregu rihun ba rihun ba ita nia joven sira,” dehan Xanana.
Jornalista: EST 1
Editor: Xisto Mendonça
