DILI, STLTIMORLESTE.com – Primeiru Ministru (PM), Kay Rala Xanana Gusmão hatete, prontu no preparadu atu tama kadeia, bainhira komunidade Bekora hatoo keixa ba iha Tribunal.
Primeiru Ministru, Kay Rala Xanana Gusmão hatoo lia hirak nee ba jornalista sira, bainhira remata halao enkontru semanal ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Kinta (10/04/2025).
Xefe Governu hatete, Governu oras nee daudaun atu halo estrada, maibe mosu dezentendimentu entre komunidade neebe dehan nain ba rai, tanba nee karik la satisfas hatoo keixa, Primeiru Ministru prontu atu tama kadeia.
“Nain ba rai loos duni, hatudu took ba rai nee sira nian, loos duni hau hatete ona ba sira hau prontu ba kedeia, hau la importa, hau ba dala rua tiha ona, horibainrua laos premeiru vez hau sai Polisia Tranzitu iha Bekora imi toba hela, hau dehan tiha ba SEATOU hau dehan tiha ona ba Obras Publiku lalika tan, husik ba, ami atu hahu ona haluan ponte Bekora nian, halo daudaun ona estrada husi liman karuk nia hotu tiha halo fali liman loos, ami halo daudaun ona too fali iha ponte sorin balu haluan tiha, kuandu too iha Bekora sira nunee nafatin, sim hau sei fo ordem ita halo estrada didiak nia luan para kareta sira liu, maibe sira dehan rai nain, ita tenke respeita, lae hau ba kadeia entaun ita halo tiha moru boot ida nia labele mai estrada tanba rai nain nian,” katak PM, Xanana.
PM dehan, se halo estrada ba mak kona uma ruma dehan rai nain, ba fali fatin seluk dehan tan rai nain tan, tenke respeita tebes sira.
“Neebe hau preparadu ona atu ba kadeia, sira lori ba Tribunal hau hatene katak ba Tribunal hau tama kedas ona kadeia,” katak PM, Xanana.
Relasiona ho polemika nee oinsa Governu bele buka dalan atu bele rezolve entre komunidade Bekora ho SEATOU, hatan ba kestaun nee PM hatete, se protesta nafatin, bainhira Governu hadia tiha estrada iha Kuluhun lai, tanba komunidade sira apoiu Programa Governu atu hadia estrada, tanba nee sira nunka mais ezije sira nia direitu, nunee Governu hadia daudaun ona.
“Hadia uluk mak parte karuk nia hotu tiha hadia fali parte liman loos, atu konsidera direitu boot liu estadu nasaun ami sei ba, atu temi karik uma ida, ami sei hakruuk ba uma nain nee, estrada mai hanesan nee, nee labele book, depois mak ita haree, ida nee komu sira nia rai ema ida labele sama, asu ida labele tama, buat ida ami sei halo moru boot ida para proteje sira nia rai, lae ema mai hadau arbiru,” dehan Xefe Governu.
Nunee mos Prezidente Republika, Jose Ramos Horta hatete, bainhira Governu liu husi Sekretariu Estadu Assuntu Toponimia no Organizasaun Urbana hakarak halo eviksaun ba komunidade neebe hela iha rai privadu tenke fo kompensasaun.
(eme)
