DILI, STLTIMORLESTE.com – Primeiru Ministru (PM), Kay Rala Xanana Gusmão husu joven sira proteje Oseanu, nunee proteje ema nia moris iha futuru.
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Kinta (12/06/2025).
“Husu deit ba joven sira partisipa ho laran atu kaer metin ida nee, hau repete fila fali ita proteje Oseanu proteje imi nia futuru, tanba nee mak hau nia tasi hau nia Timor nee bele husi Oseanu buat sira nee hotu mak bele mai hodi ita bele moris, neebe husu nafatin ba joven sira liu-liu labarik sira iha eskola katak labele haluha Oseanu hola parte ita nia vida, ita nia moris, mezmu ita la kaer ikan mos tanba iha neebe oksijeniu mai ita bele moris,” dehan Primeiru Ministru.
Primeiru Ministru dehan, iha hasoru malu nee koalia kona-ba Oseano nomos asuntu seluk tan maibe labele fo hatene ba jornalista sira.
Aleinde nee Primeiru Ministru mos informa ba Prezidente Republika kona-ba desizaun neebe Governu hasai husi Konselhu Ministru nomos informa mos katak aban nee komesa reuniaun atu prepara ona Orsamentu Jeral Estadu ba tinan 2026, maibe iha problema boot nafatin tanba nee mak halo ulun moras.
“Tanba problema boot nafatin nee mak halo ulun fatuk moras, tanba iha fatin barak sei kaer nafatin sistema neebe VIII Governu rai hela iha neeba, kuandu buat nee diak hotu ona ita avontade liu,” dehan PM Xanana.
Aleinde nee Primeiru Ministru mos informa ba Prezidente Republika katak hahu desentralizasaun Governu lokal, tanba nee Governu mos esforsu hodi prepara implementa Governu lokal.
Atu hahu desentralizasaun Governu lokal iha Munisipiu hotu hotu ita mos haree ona katak iha munisipiu hotu-hotu iha prezidente Autoridade Munisipal ema munisipiu nia oan feto ka mane neebe, agora fokus ba rekursu umanus servisu hodi prepara aan ba Governu lokal nee.
Aleinde nee Primeiru Ministru dehan, iha ema balun neebe mak halo sapotajen ida laos Timor oan tanba Governu bolu tiha ema husi liur mai maibe atividade sira la lao, maibe sira haree ida nee laos primeiru vez maibe iha okaziaun seluk mos atividade lao hela maibe derepente hamete fiu mate, tanba nee sei halo investigasaun profundu iha Ministeriu Negosiu Estranjeiru no Kooperasaun (MNEK) para ema neebe halo sapotajen nee sai.
Tanba nee Governu sei husu ba SNI no parte hotu atu haree didiak ema nebee mak laiha kompromisu atu servi rai ida nee, ema nee laos Timor oan hasai tiha.
Iha biban nee Prezidente Republika Jose Ramos Horta mos husu ba joven sira atu soe lixu iha nia fatin, se bainhira soe lixu arbiru tun monu rai lori ba tasi hafoer taxi no estraga diversidade tasi.
Tanba nee Prezidente Republika husu povu iha Timor laran tomak liu-liu joven sira soe lixu iha nia fatin, nunee labele hafoer tasi bainhira tempu udan.
(eme)
