DILI, STLTIMORLESTE.com – Sosiedade Sivil husu Governu atu halao investigasaun ba Ministeriu Justisa (MJ), tanba Primeiru Ministru, Kay Rala Xanana Gusmão rezeita uza nia imajen iha kodigu sivil.
Diretor FONGTIL, Valentim Pinto hatete, Primeiru Ministru rezeita atu uza nia fotografia ba iha kodigu sivil, tanba saida mak Ministeriu Justisa tenke uza, ida nee Governu presiza halo ezame no investiga.
“Ita nia Primeiru Ministru rezeita tau nia fotografia iha kapa kodigu sivil, nee hatudu katak, nee permite tau deit logo Estadu ka logo Ministeriu Justisa nian nee ita respeita tebes Primeiru Ministru nia reseisaun ida nee katak, nia rezeita uza nia fotografia entaun tenke uza simbolu ida neebe bele garante estabilidade ou laiha potensia mudansa iha futuru se Governasaun nee troka,” dehan Valentim ba jornalista sira iha salaun HAK, Dili, Tersa (12/08/2025).
Primeiru Ministru rasik lakohi uza nia imajen ba iha Kodigu Sivil, saida mak Governu liu husi Ministeriu Justisa halo, hatan ba kestaun nee Diretor nee hatete, Primeiru Ministru rasik la hatan presiza respeita.
“Hau sente labele tau imajen nee tenke tau duni imajen neebe ema hotu-hotu sente sai hanesan nain, logo Ministeriu Justisa nian ka ou Logo RDTL ida nee naton ona, maske lei ida nee produs iha Governasaun atual Primeiru Ministru, Kay Rala Xanana Gusmão lidera mais la naton atu para uza nia fotografia, presiza respeita Primeiru Ministru nia desizaun atu la aprova uza ninia fotografia iha dokumentu ida nee,” dehan nia.
Nia hatete, presiza husu ema neebe mak inisia tau fotografia Primeiru Ministru, Kay Rala Xanana Gusmão ba kodigu sivil nee presiza responsabiliza.
“Hau hanoin tenke husu se mak uluk inisia hodi tau fotografia ida nee, hau hanoin Governu halo ezame ruma investigasaun ruma tanba saida mak ida nee bele too no kontinua halo produsaun iha livru nee,” hatete Valentim.
Nunee mos Diretor HAK, Feliciano da Costa Aroujo hatete, ida nee violasaun mai husi Ministeriu Justisa rasik.
“Ami nia haree mak violasaun ida nee bele mai husi Ministeriu Justisa, ema nain rasik no deklara katak nia la konkorda, ita hakarak buka ida nee maun boot atu gava ita ka, katuas nee hatete katak laos Timor- Leste mak nia tenar nia iha rai liur sira nee famozu tiha ona ema konhese nia muito bem nusa maki ta tenke halo buat sira nee nee signifika hatudu ba maun boot katak o serbisu diak, nusa la halo buat seluk nusa laharee konaba problema rai nia nusa la haree reforma justisa no buat seluk nusa tau ida nee ida nee bele tau deit logo Justisa no RDTL, hau hanoin PM rasik lahusu tau nia imajen,” dehan Feliciano.
Aleinde nee Primeiru Ministru (PM), Kay Rala Xanana Gusmão dehan, nia rasik lakohi uza nia fotografia ba iha kodigu sivil.
“Nee hau la simu, tanba laos hau mak halo, hau sei tau sira iha Tribunal para sira selu hau, tanba uza sala hau nian foto. Ba husu sira neebe publika buat nee, hau la hatene, maibe hau nia pozisaun nee hau la simu,” dehan PM, Xanana.
(eme)
