DILI, STLTIMORLESTE.com – Primeiru Ministru (PM), Kay Rala Xanana Gusmão sai orador prinsipal ba iha lansamentu ba relatoriu dezenpenhu ekonomiku iha Timor Leste (TL) tinan 2024 ba Banku Sentrál nian kona-ba dezenvolvimentu ekonomiku iha TL.
“Relatóriu ida nee fornese analiza komprensivu ida kona-ba ita nia nasaun nia trajetoria ekonomika, oferese hanoin sira neebe iha valor kona-ba progresu neebe ita halo ona, dezafiu sira neebé ita kontinua hasoru no asaun estratejiku sira neeebe presiza atu alkansa kresimentu sustentavel no inkluzivu,” Hatete PM Xanana liu husi nia diskursu, bainhira sai orador ba lansamentu relatoriu dezenpenhu iha Ministeriu Finansas, Aitarak Laran, Dili, Sesta nee (21/03/2025).
Xefe Governu salienta, Governu sei kontinua servisu besik ho Banku Sentral, setor privadu no parseiru dezenvolvimentu sira hodi implementa reforma sira neebe hasae kompetividade ekonomika no hadia governasaun.
“Hau hakarak kongratula ba Banku Sentrál ba ninia dedikasaun hodi produz relatoriu ekonomiku krusial ida nee, neebe sai hanesan instrumentu orientador ida ba elaborasaun politika neebe informadu no kontinua servisu hamutuk ho perseiru dezenvolvimentu sira,” dehan Xefe Governu.
Iha fatin hanesan, Governador Banku Sentral Timor Leste (BCTL – sigla português), Helder Lopes akresenta, eventu lansamentu ba relatoriu ida nee importante tebes, tanba relatoriu ida nee ninia dezenpenhu ekonomiku iha 2024 diak liu duke kompara ho 2023.
“Hau hanoin serimonia lansamentu ohin nee diak tebes, espera tinan ohin ami bele organiza fali no lansa fali ninia magnitude nia organizasaun neebe mak hanesan, tanba relatoriu ida nee ita nia dezenpenhu ekonomiku iha 2024 diak liu kompara ho 2023.
Governador nee afirma, relatoriu ida nee aprezenta 2024 kresimentu ekonomiku sae ba 2.4% kompara ho 2023 kresimentu ekonomiku sae ba 4%, tanba despezas publika neebe aumenta iha tinan refere nee konsege dudu hodi kontribui ba kresimemtu ekonomiku konsumu no setor privadu neebe konsumu agregadu.
(EST 2)
