DILI, STLTIMORLESTE.com – Primeiru Ministru (PM), Kay Rala Xanana Gusmão hatete, salariu desimu terseiru ba funsionariu publiku sira sei selu iha fulan Janeiru nia laran.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta nee (08/01/2026).
Primeiru Ministru dehan, salariu desimu terseiru la selu iha Dezembru, maibe sei selu iha fulan Janeiru nia laran, tanba nee funsionariu sira labele ezije beibeik.
“Nee laos primeira vez mak la selu iha Dezembru, mais iha janeiru selu nee laos primeira vez, neebe funsionariu sira be ezije dehan osan desimu tersieru laiha, devia agradese lae ba sosa tiha tua depois oan sira ba eskola osan laiha, neebe husu ba funsionariu sira nee primeira vez mak akontese lae, nee kalkula mos mais prontu, nee duni hotu-hotu hatene ona katak iha fulan Janeiru sei selu,” dehan Primeiru Ministru Kay Rala Xanana Gusmão.
Primeiru Ministru dehan, foin daudaun nee mak iha feriadu ida naruk nia laran,” se imi hakarak imi ba too iha finansas haree diretor hotu-hotu husi ministeriu husi instituisaun sira seluk iha finansas neeba atu loke pri-balance osan komesa bele sai ona, ba husu neeba ba agora iha finansa,” katak Primeiru Ministru.
Aleinde mandatu Prezidente RAEOA nia remata iha 31 Dezembru karik oras nee Governu extende tan ka lae? Hatan ba kestaun nee Primeiru Ministru hatete, ida nee Primeiru Ministru la hatene.
“Nee hau la hatene, haree ba sira hatene buat hotu hotu,” dehan Primeiru Ministru Kay Rala Xanana Gusmão.
Aleinde nee foin lalais Primeiru Ministru Kay Rala Xanana Gusmão husu membru Governu presta servisu diak, oinsa Primeiru Ministru nia observasaun ba sira nia servisu durante nee, hatan ba kestaun nee Primeiru Ministru hatete nia la konhese sira hotu.
“Hau la konhese sira hotu, hau konhese instituisaun, se instituisaun mak hatudu servisu ladiak hau koalia iha laran neeba sira serbisu diak, mais ema nia aman nee mak la hatene servisu, neebe hau la bele temi funsionariu, temi instituisaun la hakaas aan,” katak nia.
Xefe Governu dehan, la temi funsionariu ida-idak maibe temi mak instituisaun ida-idak karik halao servisu ladiak sei ezije ba instituisaun para halo servisu diak, laos ba funsionariu sira ida por ida.
Reportajen: Emerenciana Pinto
