DILI, STLTIMORLESTE.com – Primeiru Ministru (PM), Kay Rala Xanana Gusmão hatete, semana oin IX Governu sei defini diploma neebe mak urjente, hodi bele halo aprovasaun.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Bairo Pite, Kinta (09/01/2025).
Primeiru Ministru informa, Governu liu husi Konselhu Ministru desidi ona Ministeriu hotu-hotu prepara diploma, no diploma nee husi dekretu no dekretu lei, tanba nee semana oin sei defini lo-loos saida mak urjente ou importante hodi bele aprova.
“Semana mai nee ami sei defini lo-loos, tanba temi buat ida diploma nee mak dekretu nee, Governu nia dekretu lei Governu aprova mai Prezidente promulga, lei nee tenke liu husi parlamentu mak lori mai Prezidente, neebe buat hotu prepara daudaun ona. Nunee Kuarta mai nee ami sei defini too primeiru trimestre Janeiru, Fevereiru no Marsu, saida mak urjente saida mak importante iha kategoria tolu nee atu aprova,” dehan Primeiru Ministru nee.
PM Xanana hatete, ida neebe mak ladun urjente ba fali kotuk oituan, nee duni lembra deit katak kona-ba lei Timor Leste nia adezaun WTO, Organizasaun Mundial Komersiu nee Governu tenke aprova lalais para lori ba Parlamentu Nasional diskuti no lori mai Prezidente Republika promulga.
PM hatete, tinan mai nee sei lao, maibe laos kedas aban ka bainrua, maibe PM sei fo fulan rua tanba PM rasik hatene kada Ministeriu ida saida saida mak sei halo, no fulan rua sei lao haleu Timor, hodi haree servisu lao ka lae, nunee mai bele bolu fali atensaun.
PM dehan, iha Kuarta nee Governu atu alterasaun ba PNDS, planu dezenvolvimentu Suku neebe uluk husi Dili mak haree mais ikus nee entrega ona ba autoridade munisipais, maibe problema boot mak laiha kontrola tanba sistema finansas nia.
Xanana hatete, Konselhu Ministru mos aprova no desidi ona katak ministeriu hotu-hotu, instituisaun seluk mos sei halo relatoriu kona-ba irregularidade neebe iha, nunee bele fo hatene ba povu katak buat nee akontese, fo hatene sosiedade katak partidu ka grupu ida manan tiha ba estraga fali osan povu nia.
(eme)
