DILI, STLTIMORLESTE.com – Primeiru Ministru (PM), Kay Rala Xanana Gusmão hatete, semana oin X Governu Konstitusional realiza planu desentralizasaun Governu lokal.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (19/02/2026) hatete, semana oin Governu sei realiza desentralizasaun Governu lokal.
“Hau mos informa ba Prezidente Republika katak, tuir planu Governu nia ba desentralizasaun Governu lokal hahu iha semana mai nee, hau atu sai ba munsipiu ida loron ida munisipiu loron ida, too 18 Marsu, tanba husi MAE halo tiha ona avaliasaun kona-ba servisu sira neebe halao iha kada munisipiu hatene ona iha neebe mak iha eru, iha neebe mak kapasidade la too, neebe agora nee atu ba ultima vez hodi too iha fim de terseiru trimester avalisaun halo nafatin para ita bele deside,” katak PM Xanana.
Avaliasaun nee halo iha finansas, administrasaun, planeamentu, ezekusaun buat sira nee hotu iha PNDS buat sira nee hotu atu deside munisipiu neebe mak bele tama iha eleisaun iha tinan 2027 nee.
“Laos tama hamutuk ita mak fo ezemplu ida Munisipiu A seidauk Munisipiu B diak ona tama ona munisipiu C, D seidauk, E diak tama ona neebe ita halo neineik hodi desentralizasaun lao daudaun ona Governu lokal mos lao hodi povu rasik mos partisipa haree hatene komprende ezekusaun orsamentu nee lao oinsa planeamentu nee halo oinsa selae mai hotu central ita haree suku husi tutuala nia ba too iha Oecusse tasi feto too tasi mane hotu hotu dehan ami nia, ami nia, ami nia tanba hotu hotu sente katak ami nia nee mak tenke haree kedas ona urjente liu, mais kuandu iha ona munisipiu nia laran suku sira hamutuk Xefe Aldeia sira hamutuk, Postu Administrativu sira hamutuk ho katuas sira hotu tuur hamutuk dehan lae haree ba rua, tolu, haat, hamutuk husu bee tanba bee mak urjente liu entau tinan ida nee ita halo ida nee, tinan seluk ita halo eskola, saude, estrada, eletrisidade, buat oin oin deit agrikultura, turismo buat sira nee hotu,” dehan PM Xanana.
Primeiru Ministru hatete ohin imforma ba Prezidente Republika katak Primeiru Ministru sei sai hahu 24 Fevereiru lao sai munisipiu sira too marsu para deskute didiak hodi haree ona, temi karik ida nee lahatene halo planeamentu sai ba fali fatin seluk.
“Senhora ida nee iha Finansas mais lao ba mai deit tau fali seluk buat sira nee hotu, senhora ida neeba iha imprensa mais husu sasan sira nee mos arbiru deit sai, ba hamos rai deit neebe ema sira neebe hili atu ba tau iha neeba serbisu ho kapaas para povu mos sente katak Governu lokal nee, sira nia governu rasik,” katak PM Xanana.
Xefe Governu dehan eleisaun nee ba asembleia munisipal ba deputadu munisipais, komu munisípiu ida kiik enrelasaun ba Timor tomak, mai tiha Parlamentu Nasional.
“Iha munisípiu nia laran, povu hili nee ema sira nee hau husi neeba, hau hatene, sira bele kontrola diak liu governu nia atividade, nunee, osan povu nian, gasta ho diak duni,” Katak Xanana.
PM Xanana dehan, asuntu importante nee mak mai hatoo ba Prezidente Republika Jose Ramos Horta.
(eme)
