DILI, STLTIMORLESTE.com – Primeiru Ministru (PM), Kay Rala Xanana Gusmão hatete, telekomunikasaun Telkomcel sai ona parseria ho Governu iha tinan barak, hodi kontribui ba dezenvolvimentu Timor Leste iha area telekomunikasaun.
Primeiru Ministru, Kay Rala Xanana Gusmão hatoo kestaun nee liu husi nia diskursu bainhira partisia iha eventu Telkomcel Annual International Summit (TAIS) 2025, iha salaun Multiuzu Bebora, Kinta kalan 27/02/2025.
Iha biban nee Primeiru Ministru agradese ba Telkomcel neebe sai ona parseiru Governu durante tinan barak nia laran hodi kontribui ba dezenvolvimentu nasaun Timor Leste (TL) iha area Telekomunikasaun nian.
Primeiru Ministru dehan, simeira internasional kona-ba teknolojia, klutura no turizmu nee atu selebra ezistensia Telkomcel nian ba dala-12 iha TL no oinsa prespetiva kona-ba futuru konektividade no dijitalizasaun.
“Telkomcel neebe sai ona parseiru Governu durante tinan barak nia laran hodi kontribui ba dezenvolvimentu nasaun Timor Leste (TL) iha area Telekomunikasaun nian,” dehan PM Xanana.
Xefe Governu mos rekomenda ba Telkomcel atu kontinua halao misaun laos deit hanoin ba negosiu maibe apoia liu tan iha servisu sosial sira ba povu Timor Leste.
Nunee mos Embaixador Indonezia iha Timor Leste, Okto Dorinus Manik hateten, misaun Telkomcel laos deit halao negosiu, maibe kontinua halo renovasaun hodi atende populasaun liu husi dezenvolvimentu konektividade infraestrutura no mos liu husi programa servisu sosial ba dezenvolvimentu sosiedade.
“Tanba nee mak hau dehan, Telkomcel kontinua konsistente hodi fo atendimentu ba povu Timor Leste laos deit iha negosiu, maibe Telkomcel sempre oferese servisu ida neebe lori impaktu pozitivu ba populasaun Timor Leste tomak,” Okto Dorinus Manik hateten.
Diplomata nee apresia liu tan ho Telkomcel iha momentu sai hanesan provider prinsipal hodi fornese internet durante vizita Sua Santidade Papa Francisco iha Tasi-Tolu, buat hotu-hotu lao diak tebes no internet laiha problema.
Tanba nee mak nia iha espransa katak, ba oin Telkomcel sei dezenvolve aan diak liu tan no sei fo liu tan asistensia melhor ba populasaun iha konektividade internet no servisu sosial.
Iha ambitu nee, Telkomcel hili Kay Olo Sword Gusmão sai hanesan Embaixador Dijistar Telkomcel nian, hanesan parseiru ida neebe hakarak atu kapasita joven sira, promove empreendedorizmu no impulsiona transformasaun dijital iha Timor Leste.
Iha okaziaun nee asina Memorandum of Undenstanding (MoU) ida no Kay Olo konsidera katak, MoU nee reprezenta deit akordu formal ida no reprezenta liu vizaun konjunta ida neebe iha atu kria futuru ida brilhante liu no inovador ba Timor Leste hamutuk ho joven sira.
CEO Telkomcel, Ardiyanto Priyo hatete, telkomcel laos deit hatan ba nesesidade komunikasaun pesoal, maibe mos aumenta produtividade negosiu no apoia setor governu nian.
Hanesan parte ida husi ninia kompromisu atu aselera dijitalizasaun no kapasita komunidade sira, Telkomcel lansa ona programa no inisiativa oin-oin neebe fo apoiu ba dezenvolvimentu ekosistema dijital iha Timor Leste.
Empreza sente orgulhu tebes ho diversidade husi nia funsionariu sira, ho 95% husi Telkomcel nia empregadu liu 200 mak talentu lokal, no 75% husi pozisaun jestor sira okupa husi oan mane no oan feto sira neebe melhor ka diak husi Timor Leste.
(eme)
