DILI, STLTIMORLESTE.com – Primeiru Ministru (PM), Kay Rala Xanana Gusmão hateten, Timor oan bele dudu malu, motiva malu, hodi produz produtu lokal sira, nunee bele reduz importasaun, wainhira ita organiza sira produz produtu lokal tau iha merkadu, ita iha dever atu sosa.
Liafuan nee hatoo husi Primeiru Ministru (PM) Kay Rala Xanana Gusmão ba jornalista sira liu husi nia diskursu hafoin taka enseramentu Dili Internasional Trade Expo 2025, iha Sentru Konvensaun Dili, Segunda kalan (01/09/2025).
“Ita hotu hamutuk iha hanoin ida deit, presiza servisu hamutuk hodi dudu produtu lokal sira, nunee neineik ba neineik sei reduz ou hamenus importasaun, tanba ita sosa husi liur, osan ba hotu neeba,” dehan PM Xanana.
Xanana dehan, simu tiha osan haruka fali ba iha rai liur, nusa la sosa produtu lokal hodi reduz importasaun, ema sira neebe mak produz, hatene katak ema sei sosa, lae ita mak nunee deit, balun moris diak, balun kontinua kiak ba beibeik, ida nee mak fo atensaun ba Timoroan tomak, laos koalia deit.
Tamba nee mak atu estabelese Banku Nasional Dezenvolvimentu hodi ajuda mikropekenas sira neebe mak lao daudaun ona, fiar aan ba, halo daudaun ona, osan sei la ba liur, osan nee sei ba tiha iha sira neebe mak produz produtu lokal hodi hadia sira nia moris loron-loron.
“Governu fiar imi, sei iha Banku Nasional Dezenvolvimentu envia ba BNCTL, Mandiri, BRI no iha BNU, banku sira seluk sira nia atividade luan, ba buat hotu atu ajuda mikropekenas sira,” katak Xanana.
PM Xanana mos bolu atensaun ba Ministeriu Komersiu Industria (MKI), Ministeriu Edukasaun (ME) no mos Ministeriu Administrasaun Estatal (MAE) katak, iha fatin barak produz Sorgun atu fo merenda eskolar ba labarik sira.
“Ho ida nee mak atu lembra ba ME no ba MAE, karik ita bele sosa sorgun atu fo merenda eskolar ba labarik sira, aifarina ita nia, bolu atensaun ba hotu-hotu atu buka aproveita didiak ida nee, liu-liu sira fo hatene iha fatin neebe kooperativas Sorgun halo daudaun ona, husi sorgun bele hetan masin midar bele hetan bani been no buat oin-oin deit iha neeba,” PM sublinha.
Iha fatin hanesan Prezidente Republika (PR) Jose Ramos Horta hatoo parabens ba PM no membru Governu sira hotu, ba setor privadu nasional, no setor privadu internasional, sira neebe mak kontribui diak tebes ambiente koletivu mai iha nee.
“Parabens ba susesu boot ba Dili Internasional Trade Expo 2025 ida nee, parabens ba setor privadu nasional no internasional, ita agradese ba sira neebe mak mai husi liur, ida nee hatudu kapasidade Governu nian organiza eventu nee, tanba eventu ida nee laos foin halo maibe barak ona, halo iha Timor laran tomak, tinan rua tolu liu ba,” Horta Hakotu.
Jornalista: EST 1
Editor: Xisto Mendonça
