DILI, STLTIMORLESTE.com – Primeiru Ministru (PM), Kay Rala Xanana Gusmão hatete, kresimentu ekonomiku Timor Leste aseleradu iha 2024 husi 4.0% sai hanesan melhoria ida neebe iha relasaun husi 2.4% neebe rejista iha tinan 2023.
Lia hirak nee hatoo husi PM, Xanana liu husi nia diskursu, bainhira sai orador prinsipal ba lansamentu relatoriu dezenpenhu ekonomiku Timor Leste, iha Ministeriu Finansas, Aitarak, Laran, Dili, Sesta nee (21/03/2025).
“Ida nee refleta ita nia esforsu koletivu iha fortalesimentu prinsipal kona-ba impulsionador ekonomiku sira, prinsipalmente husi meiu espansaun setor publiku neebe kontinua estimula atividade sira setor privadu nian,” hatete PM, Xanana.
Nia dehan, ekonomia iha Timor Leste kontinua hasoru limitasaun estrutural inklui kapasidade absorsaun neebe limitadu no dependensia aas ba importasaun ba setor privadu sira neebe seidauk dezenvolve.
“Diversifikasaun ekonomika presiza aprosimasaun ida neebe olistiku, integradu no partikularmente husi setor privadu, enkuantu kresimentu ida ne’e enkoraja nafatin iha Governu nia alvu 5.0% nia okos nomos ba setor privadu sira neebe mak seidauk dezenvolve,” Xanana sublinha.
Governante nee haktuir, atu rezolve kestaun ida nee Governu iha nafatin kompromisu ba konsolidasaun fiskal, fator sira nee kontribui ona ba dezekilibriu sira iha kresimentu, ho despeza públika neebé dudu atividade ekonomika barak liu.
Iha fatin hanesan, Governador Banku Sentral, Helder Lopes hatete, Relatoriu Dezempenhu Ekonomiku 2024 fornese analize no informasaun komprensivu kona-bá Timor Leste nia progresu ekonomiku, dezafiu sira neebe hasoru.
“Iha 2024 Timor Leste nia ekonomia hatudu reziliensia maske iha inserteza global ita haree kresimentu ne’ebe dudu maka’as husi investimentu estratejiku sira no jestaun fiskal neebe diak liu, inflasaun kontinua iha kontrolu no ita nia setor finanseiru sira,” Helder Lopes hatete.
(EST 2)
