DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Universidade Catolica Timorense (UCT) universidade neebe kualidade no sei produs joven sai lideransa diak iha futuru.
PM Kay Rala Xanana Gusmão hatoo kestaun nee liu husi nia diskursu bainhira partisipa serimonia inaugurasaun edifisiu UCT iha Balide, kuarta kalan (19/03/2025).
“UCT harii la too tinan 4 sai ona hanesan referensia ida ba ensinu no investigasaun iha rai laran hodi fornese edukasaun ho kualidade ba ita nia joven sira no ba futurus líderes nasionais sira, maibe mos dezenvolvimentu intelektual no espiritual neebe funda iha prinsipiu moral, etiku no relijiozu sarani neebe forte,” dehan PM Xanana.
Tanba nee, sai hanesan previleiju adisional ida atu selebra ohin, iha akompanha husi lideransa no dosente neebe vigorozu no komprometidu, ida-nee akreditasaun institusional ba nível exelensia universidade ida nee nian, husi Ajensia Nasional ba Avaliasaun no Akreditasaun Akademika (ANAAA).
“Parabens ba hotu-hotu ba atinjimentu foin lalais nee no hau hein katak ita boot sira sei kontinua servisu hodi fo formasaun akademika ho kualidade ba foinsae Timoroan sira. Esensial tebes atu ita nia rekursus umanus iha ferramenta sira neebe apropriadu ba ita nia realidade, atu nunee bele kontribui ba nasaun nia dezenvolvimentu ho forma kompetitiva ho instituisaun universitariu sira seluk inklui internasional sira,” katak PM.
PM Xanana dehan, líder nasional sira neebe iha Timor Leste presiza atu konsolida ninia independensia no dezenvolvimentu sustentavel, mak sira neebe komprende sira nia responsabilidade, tanba hetan ona asesu boot liu ba konhesimentu, siensia, teknolojia no dezenvolvimentu ba sira nia kapasidade krítika, pesoal no interpesoal.
“Hau hein katak sira sei asumi sira nia misaun fundamental iha sosiedade Timorense, hanesan sira nia inan aman no avo sira asumi sira nia misaun iha tinan 50 ikus nee, atu liberta no dezenvolve patria, hodi tau nesesidade koletiva sira aas liu kualker nesesidade individual,” katak PM Xanana.
Xanana enkoraja ema hotu atu muda husi mentalidade submisaun nian ba moris diak superfisial ba mentalidade dignu ba identidade Timoroan nian luta nafatin ba ema hotu nia liberdade, dignidade no moris diak, ho fiar iha Maromak no prontu atu servi patria.
Nunee mos Reitor UCT, Padre Joel Casmiro Pinto hatutan, ho mensajen Primeiru Ministru nia ida nee iha sentidu boot no UCT mos nafatin iha kompromisu atu eduka joven sira laos kualidade maibe kuantidade.
“Nee hanoin neebe diak tebes nee sua exelensia Primeiru Ministru hatoo mensajen provokativu ba ami ho sentidu pozitivu hanesan ohin amu kardeal temi PM Xanana Kuu oituan-oituan UCT, maibe nu fim nia apresia buat neebe UCT halo, ho esperansa ida nee ita hotu iha esperansa, espera katak kualidade nee mak importante laos kuantidade, tanba nee UCT kuandu simu alunus foun nia liu husi selesaun neebe rigoroza, selesaun neebe kada tinan UCT simu mais lahakat liu 500, nee signifika katak nee liu husi selesaun neebe rigorozu tebes atu bele oinsa kontribui ka fundamentu formasaun ba foinsae sira neebe kualifkadu,” katak Reitor.
Reitor dehan, UCT simu estudante 500, tanba hakarak fo formasaun neebe rigor kualifikadu ba estudante sira.
Nia dehan, atu aumenta fakuldade futuru sei iha mak kona-ba siensia no teknolojia, nee foka liu ba teknolojia bio alimentar, porezemplu halo produtu kiik sira ba faan nee tenke liu husi asesmant ida no ema neebe formadu mak prepara buat sira nee.
(eme)
