DILI, STLTIMORLESTE.com – Xefe Estadu, Jose Ramos Horta hatete, nia fo kondekorasaun ba sidadaun nasional no internasional nee sai hanesan testamunha ba kompromisu fo onra ba martir sira nia luta ba independensia.
Iha Tersa nee (26/11/2024), Xefe Estadu fo kondekorasaun ba Veteranus nain 107 iha Palasiu Prezidensial no iha parte kalan Prezidente Republika Jose Ramos Horta kondekora tan sidadaun nasional no internasional iha Palasiu
Lahane Nobre.
Iha biban nee, Xefe Estadu Jose Ramos Horta hatete, kondekora kombatente libertasaun nasional no personalidade sira neebe iha kontribuisaun boot ba TL.
Iha okaziaun aniversariu Proklamasaun Independensia TL ba dala 49, Xefe Estadu prezide serimonia istoriku hodi kondekora tantu kombatente libertasaun nasional no personalidade sira neebe fo ona kontribuisaun esepsional ba libertasaun no dezenvolvimentu TL nian.
Tuir proposta husi Konselhu Kombatente Libertasaun Nasional nian, Xefe Estadu fo sai orden nasional ho kategoria tolu mak Orden Guerrilha nian neebe fo ba ema nain 19, funu nain fo ba ema nain 19, no orden Nicolau Lobato fo ba ema hamutuk 4.395.
Xefe Estadu mos nomeia ona membru sira husi Konselhu Kombatente Libertasaun Nasional nian hodi reprezenta Prezidente iha serimonia kondekorasaun sira iha loron 28 Novembru 2024, iha munisipiu sira inklui Lautem, Vikeke, Baukau, Same Manufahi, Ermera, Bobonaro Maliana, Likisa, no Manatuto.
Xefe Estadu hatete, kondekorasaun sira nee reprezenta nasaun nia gratidaun neebe dura ba sira neebe luta ba independensia.
Prezidente Ramos Horta kondekora Orden Timor Leste ba personalidade nasional no internasional hamutuk nain 81, neebe fo ona kontribuisaun esepsional ba TL nia dezenvolvimentu, estabilidade no progresu demokratiku.
Prezidente fo Orden Timor Leste iha kategoria Colar ba ema nain 8, medalha ba ema nain 15, insignia ba ema nain 14 no meritu ba ema nain 44, inklui sertifikadu konhesimentu.
(eme)
