DILI, STLTIMORLESTE.com – Xefe Estadu, Jose Ramos Horta konvoka enkontru ho ekipa tarefa, kompostu husi instituisaun Polisia Nasional Timor Leste, FALINTIL- Forsa Defeza Timor Leste (F-FDTL) inklui Servisu Nasional Intelijensia (SNI), liga ba planu preparativus ba seguransa delegasaun Indonezia nian neebe sei partisipa komemorasaun loron proklamasaun independensia ba dala-49 iha Oekusi.
Bainhira remata enkontru, Diretor Jeral SNI, Longuinho Monteiro ba jornalista sira iha Palasiu Prezidensial Bairo Pite Segunda (25/11/2024) lokraik hatete, ohin Prezidente Republika konvoka enkontru ida ho Ministru Defeza, Donaciano da Costa Gomes “Pedro Klamar Fuik”, Xefe Estadu Maiór Jenerál F-FDTL, Tenente Jenerál Falur Rate Laek, Komandante Jerál PNTL, Komisáriu Jerál Polisia Henrique Da Costa No Mós Diretór Jerál SNI, Longuinho Monteiro hodi koalia kona-ba preparativus ba seguransa delegasaun Indonezia nian neebe sei mai partisipa iha loron 28 Novembru tinan nee.
“Ohin ita nia Prezidente Republika konvoka reuniaun ida atu haree nia koordenasaun servisu entre tarefa, hodi atribui ba Ministeriu Defeza, PNTL no mos SNI nian, liu-liu kona-ba planu preparativus delegasaun Indonezia nian neebe sei mai partisipa iha loron proklamasaun independensia 28 Novembru,” dehan Linguinho Monteiro.
Longuinho Monteiro haktuir tan katak, too agora seidauk iha konfirmasaun ofisial, maibe parte seguransa no defeza hatene ona katak, konvite PR Horta nian hatoo ba Prezidente Republika Indonezia (RI), Prabowo Subianto, maibe Prabowo Subianto fo razaun la partisipa, tanba Prezidente Indonezia sei halao nian knaar servisu diplomasia iha rai liur, tanba nee delega deit ministru senior ida mak sei reprezenta Prabowo hodi mai partisipa 28 Novembru.
Nia dehan, sei mai delegasaun boot ida, mezmu nia numeru efetivu, seidauk hatene, maibe halo rasesive katak numeru nee sei boot, preparativus saida mak Timor sei halo atu simu delegasaun mai iha Timor Leste, hodi partisipa loron boot 28 Novembru neebe mak sei realiza iha Oekusi.
Diretór SNI dehan, Sekuensia nee hotu-hotu hatene katak iha loron 26-27 Novembru konfirmadu katak, delegasaun sei too mai iha Timor Leste, depois sei halo sesaun iha Dili, iha loron 28 Novembru mak sira dezloka ba Oekusi hodi partisipa iha serimonia refere.
Nia dehan, iha hasoru malu nee Ministru defeza, Donaciano da Costa Gomes “Pedro Klamar aprezenta kona-ba delegasaun Indonezia nian, no mos xefe estadu maior jeneral forsa armada aprezenta deit planu seguransa preparativus ondra ho mos protokolu estadu neebe Timor sei aprezenta ba iha delegasaun VIP Indonezia nian neebe sei too iha Dili 27 Novembru.
Nia hatutan, sira nia preparativus no notifikasaun mos tempu nee badak, tanba nee espera katak delegasaun sei reprezenta husi Ministru senior ida, se karik iha nivel Prezidente nia preparativus loron rua nee laos normal, se kuandu halo resesaun estadu ruma atu simu xefe estadu ida.
(eme)
