DILI, STLTIMORLESTE.com – Prezidente Republika (PR), Jose Ramos Horta simu Premiu Prestijiozu Guerra Junqueiro Luzofonu livraria FNAC iha Sentru Komersial Alameda.
Tuir komunikadu nee STL husi media Prezidente Republika, Domingu (27/10/2024) katak, Prezidente Republika, Jose Ramos Horta, hetan onra ho Premiu Luzofonu Guerra Junqueiro durante serimonia neebe halao iha livraria FNAC iha Sentru Komersial Alameda, Portu, iha Sabadu nee.
Premiu nee rekonhese nia kontribuisaun destakadu ba promosaun lian portuges no fortalesimentu kultura luzofona.
Elojia prestijiadu nee aprezenta husi Nuno Manuel Rocha Gomes Ferreira, Prefeitu husi Freixo de Espada à Cinta, fatin moris hosi poeta portuges konhesidu Guerra Junqueiro. Iha ninia diskursu aseitasaun, Prezidente Ramos Horta espresa agradesimentu klean ba rekonesimentu no sublina importansia husi Premio Literariu Guerra Junqueiro hodi hametin lasu sira entre nasaun luzofona sira.
Premiu anual Guerra Junqueiro selebra autor sira no figura publika sira neebe kontribui ba enrikesimentu lian portuges no patrimoniu literariu iha nasaun luzofonu sira.
Serimónia entrega premio nian iha Freixo de Espada à Cinta destaka ligasaun istoriku no kultural entre laureadu sira no knua husi eskritora portuges selebradu Guerra Junqueiro.
(eme)
