NITIBE, STLTIMORLESTE.com – Xefe Suku Beneufe, Marcos Coel Meni Sila hamutuk ho ninia komunidade sente preokupa ho sira nia kondisaun estrada husi kapital Oekusi mai area rurais, liga ho Postu Fronteira Naktuka kondisaun la diak, tanba nee husu ba Governu atu hadia.
Deklarasun nee Xefe Suku Beneufe, Marcos coel hatoo liu husi dialogu aberta husi Prezidente Autoridade Rejiaun Administrativa Espesial Oekusi-Ambeno (RAEOA), Rogerio Tiago de Fatima Lobato iha Sede Suku Beneufe, Postu Administrativu Nitibe RAEOA, Segunda (23/03/2025).
“Ami nia povu tomak iha area foho, estrada Governu hahu hadia ona, tanba nee husu ba Governu atu hadia estraga iha area tasi ibun tanba husi Oekusi mai too Suku Beneufe kuaze hakat liu mota 4 ou 5 no kondisaun estrada la diak hodi fasilita povu ba mai, inklui seguransa Unidade Patrulhamentu Fronteira (UPF) neebe halao Seguransa iha Fronteira.
Iha okaziaun nee, Jestor Postu Administrativu Nitibe, Agustinho Afulit hatoo benvindu ba Prezidente Autoridade RAEOA, Rogerio Tiago de Fatima Lobato ho Sekretariu Rejiaun sira, ohin mai vizita povu iha Suku Beneufe, hodi halao dialogu ho povu atu rona direitamente povu ninia preokupasaun.
Iha okaziaun nee, Prezidente Autoridade RAEOA, Rogerio Tiago de Fatima Lobato dehan, estrada sai programa prinsipal husi IX Governu Konstitusional neebe lideradu husi Primeiru Ministru, Kay Rala Xanana Gusmão, atu loke izolamentu povu iha area rurais.
“Hau sei koalia ho Konselhu Administrasaun Fundu Infraestrutura (KAFI) hodi halo estrada liu husi projetu emerjensia atu hadia estrada nee,” dehan nia.
Iha biban nee, George de Carvalho nuudar nain ba Empreza Relicitra dehan, estrada iha area foho neeba diak ona maibe estrada iha area Tasi ibun, hanesan rai nain Suku Beneufe sente moe haree kondisaun estrada sira nee la diak.
“Hau haree ami nian estrada iha area tasi ibun, hanesan rai nain sente moe tanba kondisaun estrada la diak no estrada nee liga ba nasaun vizinhu Indonezia iha Oepoli, maibe triste tanba estrada la diak,” dehan nia.
Iha biban nee nia husu ba Governu Autoridade RAEOA atu tau matan ba kondisaun estrada nee hodi hadia.
(jos)
