DILI, STLTIMORLESTE.com – Xefe Suku Soba, Postu Administrativu Laga, Munisipiu Baukau, Francisca Monica de Fatima Soares hatete, tinan 2025 nee sei foka liu ba infraestrutura hanesan hadia estrada no seluk tan.
“Ami nia planu ba tinan 2025 nian foka liu ba infraestrutura, hadia estrada neebe liga husi postu ba iha suku, neebe oras nee daudaun kondisaun aat hela,” hatete Francisca ba STL husi telefone, iha Laga (04/01/2025).
Nia dehan, liu husi enkontru konselhu iha suku identifika ona, nunee tau prioridade ba estrada no orsamentu 2025 PNDS nian sei mai munisipiu mak jere, tanba nee iha planu prioridade nee hadia estrada liga husi dalan nasional Postu Administrativu Laga ba too iha sede suku, nee husi Dailari ba too iha Boleha.
Nia relata, estrada nee halo reabilitasaun kona orsamentu seidauk hatene los, sei iha planu, tanba agora nee orsamentu ba iha PNDS nian sei jere husi munisipiu nunee seidauk simu osan husi munisipiu.
Tanba durante nee komunidade halerik ba estrada tinan barak ona, uluk estrada nee halo husi SEFOPE, maibe halo deit manutensaun, taka deit estrada nia kuak sira nee, nunee iha tinan 2025 planu presiza halo reabilitasaun ba estarda, atu nunee komunidade bele utiliza estrada nee ho diak.
(joa)
