DILI, STLTIMORLESTE.com – Governu Xina kontinua re-afirma kompromisu atu fo apoia dezenvolvimentu iha Timor Leste (TL) liu husi akordu kooperasaun entre Estadu rua neebe estabelese ona.
Visi Ministru Negosiu Estranjeiru Republika Popular Xina, Sun Weidong hatete, kompromisu neebe iha sira kontinua apoia, tanba nee mai hasoru Primeiru Ministru (PM), Kay Rala Xanana Gusmão, hodi afirma pozisaun Xina ba dezenvolvimentu Timor Leste. Tanba nee, Ministru Negosiu Estranjeiru Xina mai koalia kona-ba kooperasaun ho Timor Leste.
“Ita agradese tebes membru Governu ida mai dala ida tán ami la diskuti asuntu detalhada, maibe fo hatene be malu hodi afirma vontade ajuda dezenvolvimentu iha Timor Leste”, katak Primeiru Ministru, Xanana Gusmão hafoin enkontru iha Palasiu Governu, Dili, Tersa (17/12/2024).
Enkuantu Visi Ministru Negosiu Estranjeiru Kooperasaun Republika Xina, Sun Weidong senti previlejiu hodi hasoru malu ho Primeiru Ministru, Xanana Gusmão, hodi re-afirma hikas kompromisu sira entre nasaun rua nian.
“Xina ho Timor Leste hanesan belun diak no mos parseiru ba kooperasaun dezde inísiu TL restaura Independensia total nuudar Estadu Soberanu”, tenik Visi MNEK Xina nee.
Tuir nia, tinan kotuk Xina onradu simu PM, Kay Rala Xanana Gusmão, neebe partisipa iha serimonia abertura Jogu Aziatiku bá dala 19, iha Hangzhou no Prezidente Xina, Xi Jinping realiza enkontru ida neebe susesu tebes ho Xanana Gusmão no konsege atualiza parseria estratéjiku ida neebe kompriensivu liu.
Ho vizita Prezidente Repúblika, José Ramos Horta iha inisiu tinan 2024, sai mos onra ida ba Xina liu husi konkordansia ida atu avansa hamutuk ba objetivu jeral.
Husi nee mós oferese orientasaun estratejiku ba nasaun rua, hodi hametin liu tán relasaun neebe foka ba area prinsipal sira mak hanesan industria, infraestrutura no agrikultura.
Tuir Visi Ministru Negosiu Estranjeiru Kooperasaun Republika Xina, Sun Weidong katak, iha vizita nee hakarak atu implementa liu tán konsensu líder sira nian, hodi promove kooperasaun iha prátika.
Enkontru nee Primeiru Ministru akompanha husi Visi Primeiru Ministru no Ministru Koordenador Asuntu Ekonomiku no Ministru Turizmu no Ambiente, Francisco Kalbuadi Lay, Visi Ministra Asuntu ASEAN, Milena Maria da Costa Rangel. Enkuantu, Visi Ministru Sun Weidong akompanha husi Embaixadora Xina iha TL, Wang Wenli.
Visi Ministru Sun Weidong sei hasoru malu mos ho membru Governu sira seluk, hodi diskuti detalhada kona-ba asuntu konkretu kooperasaun nian.
(gui)
