DILI, STLTIMORLESTE.com – Governu Xina sei harii Hospital Militar modernu ho andar ualu (8), iha Kuartel Jeneral Fatuhada, Dili, para militar sira bele halo cek up ba sira nia saude ho diak.
“Hospital Militar neebe mak ita hetan doasaun husi Xina no horiseik hau simu informasaun husi sira, karik iha dalan neebe mak diak ona se tarde sira sei aviza mai ita hotu hatene no lansa primeira pedra depois mak sira halo konstrusaun,” hatete Ministru Defeza (MD), Donaciano Costa Gomes “Pedro Klamar Fuik” ba jornalista sira iha Kuartel Jeneral Fatuhada, Dili, Sesta (10/1/2025).
Maibe nia dehan, sei konstrui Hospital Militar iha areadores kuartel Jeneral F-FDTL Fatuhada, no sei okupa rai hektares ida hodi konstrui Hospital Militar.
Maibe Hospital Militar ida nee modernu ho andar ualu (8) ho kama atus ida (100), sala emerjensia propriu no sala internamentu propriu ba VIP no ba pasiente normais sira.
“Hau atu dehan katak, Hospital Militar tuir planu sei halo atendimentu ba kualker moras no espesifiku neebe identifika ona mak moras onkologia, Neurologia no propriu kurasaun no moras sira seluk neebe mak identifika moras iha Timor Leste,” hatete governante nee.
Tanba tuir nia, mediku no espesialista sira sei iha faze final ba preparasaun haree Komisaun instaladora sei prepara projetu atu harii Hospital Militár.
Iha fatin ketak, Akademista UNPAZ, Acasio da Silva Marques hatete, se Governu Timor Leste ho Governu Xina iha planu atu halo Hospital Militar modernu ho andar ualu (8) nee diak liu tan, para ajuda memburu F-FDTL sira bele halo tratamentu neebe dignu nomos familia forsa sira mos bele konsulta gratuita.
(jen)
