DILI, STLTIMORLESTE.com – Loja Xineza sira iha Timor Leste (TL) kontinua fo servisu ba Timoroan sira iha loron boot Natal no tinan foun, tanba trabalhador Timoroan sira neebe servisu iha loja Xineza la hetan autorizasaun ba ferias.
“Ami sente triste, bainhira fatin neebe ami servisu hanesan loja Xineza sira kontinua fo servisu ba Timoroan sira, laiha autorizasaun dignu ba trabalhador sira atu tuir loron Natal no tinan foun, tanba servisu kontinua nafatin,” dehan Trabalhador Ernesto Lopes ba STL iha Fatuhada, Dili, Segunda (23/12/2024).
Nia dehan, durante servisu iha loja Xineza lao ho diak, maibe preokupasaun mak kuandu loron boot laiha tempu ferias, no ema neebe kuandu la kumpre ida nee, osan kua ou labele servisu ona, tanba nee mak trabalhador Timoroan sira mos kontinua halo servisu, mezmu osan neebe kada fulan asesu montante US$ 115, sira neebe servisu kleur ona US$ 130 deit, maibe laiha loron toleransia nafatin
Tanba nee loja Xineza sira iha Timor Leste hotu-hotu hanesan, kuandu loron boot laiha ferias ba trabalhador sira atu ba vizita familia, liu-liu loron boot hanesan Natal no tinan foun laiha autorizasaun diak atu trabalhador sira ba tuir loron boot sira ho familia.
Iha fatin seluk, Trabalhadora servisu iha loja Xineza iha Audian, Antonina Rodrigues Soares katak, loja Xineza sira durante nee la autoriza trabalhador Timoroan neebe servisu ho sira bainhira atu ba pasa ferias ho familia sira, liu-liu tuir loron boot sira, maibe sira kontinua servisu.
“Hau servisu ho Xineza sira, liu-liu faan sasan iha loja kuaze tinan 5 ba leten, durante nee atu husu lisensa mos salariu kua nafatin, kuandu ba mak loron liu ona, kuandu ita mai fali servisu, sira la autoriza ona atu servisu, tanba sira dehan ami lakohi lakon,” katak nia.
Tanba loja Xineza sira iha sidade Dili loke ba trabalhador Timoroan sira, maibe iha kriteria, katak kuandu loron importante sira, dala ruma la partisipa, tanba loja refere kontinua servisu, entaun temlu atu ba vizita familia hamutuk ho familia laiha.
Entretantu Estudante Universidade Dili (UNDIL), area Relasaun Internasional, Fidelino das Regras dehan, loja Xineza sira iha Timor Leste, Governu liu husi SEFOPE presiza fo regras, nunee loron boot sira bele fo tempu no loron toleransia ba trabalhador sira,m hodi ba vizita familia sira.
Tanba durante nee trabalhador neebe servisu iha loja Xineza sira hakarak ba vizita familia iha loron boot sira, hanesan Natal no tinan foun, ema presiza hamutuk, nunee emprezariu sira, liu-liu loza Xineza iha Timor Leste, Governu tenke fo regulamentu ba sira, hodi loron boot tenke iha loron toleransia, nunee trabalhador sira nee idak-idak bele lao partisipa loron boot sira ho familia.
(EST 1)
