DILI, STLTIMORLESTE.com – Komunidade neebe hela iha Zulo Knua, Suku Zulo, Postu Administrativu Zumalai, Munisipiu Kovalima, tinan barak nia laran asesu deit bee posu.
komunidade Suku Zulo, Aldeia Lale, Marito Barros, nuudar mos hanesan lia nain ba STL liu husi telefone, Domingu nee (02/03/2025) hatete, tinan barak nia laran komunidade neebe mak hela iha Zulo Knua asesu deit bee posu, maske iha tinan hirak liu ba dada ona bee torneira mai, maibe bee torneira nee la sai dezde iha fulan Julhu 2023, too agora tinan ida ho balu atu ba tinan rua bee nee la sai.
“Ami uza nafatin bee posu, tanba ami laos foin uza bee posu nee, ami uza bee posu nee dezde tempu Indonezia nian too agora ami uza nafatin bee posu nee,” nia dehan.
Marito dehan, agora udan sira la susar ba bee moos, maibe bailoron naruk sira hadau malu bee too kalan boot, tanba komunidade aldeia haat mak hela iha Zulo Knua, balu hela iha Zumalai Vila, aldeia haat nee mak hanesan Aldeia Lale, Leogol, Obuk Mil no Zulo Tas.
“Bee posu nee udan nakonu, maibe bailoron nee bee maran, halo sira hadau malu bee iha tempu kalan, tanba loron nee ema barak no balu hein too kalan mak kuru bee, maibe agora udan ami la hadau malu ona bee,” dehan nia.
(jac)
