DILI, STLTIMORLESTE.com – Prezidente Republika (PR), José Ramos-Horta hatete, 20 Maiu 2002 hatun bandeira ONU hasae fali Bandeira RDTL, Timoroan sira legadu luta 24 anos violensia no pobreza.
Prezidente Republika José Ramos Horta hato’o kestaun nee iha ninia diskursu, iha Eventu Paralelu Nivel Aas, durante Assembleia-Jerál Nasoins Unidas (UNGA) ba dala 81 iha Nova Iorke.
Prezidente Ramos-Horta subliña Timor-Leste nia evolusaun dezde restaurasaun independénsia iha tinan 2002, hodi destaka progresu klean ne’ebé alkansa iha dékada rua ikus ne’e.
“Iha meia-noite 20 Maiu 2002, bandeira ONU tun no bandeira Timor-Leste sa’e. Ami simu legadu tinan 24 violénsia no pobreza extrema: médiku na’in 19, universidade ida ho estudante 3.000, no esperansa moris menus husi 60. Tinan ruanulu-resin-lima liutiha, ami iha doutór médiku na’in-14,000, espetativa moris maizumenus 70, universidade 18, PhD 210, kobertura eletrisidade 100%, no adezaun ba ASEAN Ohin loron, ami iha violénsia polítika zero no tensaun étnika ka relijioza zero,” dehan Prezidente Republika Ramos Horta liu husi komunikadu ne’ebé STL asesu Kinta (24/09/2026).
Prezidente dehan, maibé kiak ekstremu sei iha nafatin, inklui malnutrisaun Infantil, investe millaun atus ba atus husi fundu rasik, la’ós husi doadór, liu husi fundu petróleu soberanu iha edukasaun, saúde, eletrisidade, no konektividade.
Impaktu internasionál ODA nian limitadu tebes. Doador sira reklama osan dolar biliaun 10 mak aloka ba Timor-Leste hafoin 1999. Maibé imi gasta iha Timor-Leste, la’ós iha Timor-Leste. Nee mak fallansu ODA nian. Deepois nasaun OECD sira fó-sala ba reseptór sira: polítika sala, prioridade sala. Lae. Imi gasta barak liu ba imi nia espesialista rasik, estuda hafoin estuda, no mós sistema ONU nian.”
Prezidente Ramos-Horta konklui hodi reafirma katak luta hasoru pobreza kontinua, enkuantu rekoñese mós kontribuisaun Muhammad Yunus nian ba Timor-Leste liuhusi estabelesimentu iha tinan 2003 to’o 2004 programa mikrokréditu dahuluk iha nasaun, ne’ebé lansa aprosimasaun bazeia ba komunidade hodi hasoru dezafiu sira pobreza nian.
(eme)
