DILI, STLTIMORLESTE.com – Dadus pre eliminariu husi turista neebe mai vizita Timor Leste (TL) iha 2024 no 2025, sira nian kontribuisaun ba estadu porvolta milhaun US$ 78.5 ba kofre estadu.
Liafuan nee haktuir husi Diretor Jeral Turizmu, Antonio da Silva ba jornalista sira iha Centru Convensaun Dili, Kuarta (12/08/2026).
Nia hatete, dadus pre eliminariu turista neebe mai vizita TL iha 2024 hamutuk 26,972 ho nia kontribuisaun ba ekonomia porvolta milhaun US$ 28. Iha 2025 nia kresimentu nee kuaze 75% no nia kontribuisaun porvolta milhaun US$ 50.5 ho total vizitante rihun 45 resin.
“Iha 2024 ita hetan US$ 26,972 ho nia kontribuisaun ba ekonomia nee porvolta milhaun US$ 28 mai ita. Iha 2025 nia kresimentu nee kuaze 75% no nia kontribuisaun porvolta milhaun US$ 50.5 ho total vizitante rihun 45 resin husi estranjeiru sira neebe mak ita konta mai TL halo atividade, lo-loos konsentra ba turizmu nian,” dehan nia.
Nia afirma, hanesan ema neebe mak mai ho durasaun limitadu ho objetivu mai halo atividade turizmu inklui mos ho sira mai esplora potensia ba investimentu, tanba TL presiza duni sira bazeia ba definisaun turizmu nian sira neebe mak vizita ba nasaun ida menus husi tinan ida, entaun konsidera hanesan turista.
Nia hatutan, tanba nee ho esperansa katak, turizmu nia prosesu ba oin nee depois integra ba ASEAN no investimentu neebe sei halo iha setor turizmu rasik sei hasae diak liu tan numeru turista sira mai TL.
Iha sorin seluk, Estudante DIT, Fakuldade Turizmu, Joni Correia hatete, bainhira Governu TL investe didiak iha fatin turistiku sira neebe iha rai laran, konserteza sei atrai turista sira nia vizita mai TL. Aleinde nee sei fo mos reseitas ba kofre estadu.
Nunee mos Estudante UNTL, Fakuldade Petroleu, Febbi Ribeiro hatete, fatin turistiku neebe iha rai laran nee presiza atensaun husi governu hodi hadia halo didiak, hodi nunee halo investimentu ho diak. Para nunee bele hatama reseitas ba kofre estadu, atu nunee TL labele dependensia deit ba fundu petroliferu.
(dom)
