DILI, STLTIMORLESTE.com — Hamutuk 34 kandidatu ne’ebé admitidu iha faze selesaun dokumentus ba vaga iha Supremu Tribunal Justisa (STJ) hahú ona halo ezame eskrita iha Sesta-feira, 18 Setembru 2026, no sei kontinua fali iha loron 21 fulan ne’e.
Prezidente Komisaun Rekrutamentu no Selesaun Juri ba STJ no Tribunal Rekursu (TR), Avelino Coelho, hateten katak ezame eskrita ba STJ hahú iha Sentru Formasaun Jurídiku no Judisiáriu (SFJJ), no kandidatu sira sei kontinua tuir kalendáriu ne’ebé determina ona.
“Formalmente, tuir ita-nia ajenda ka kalendáriu, ita hahú ezame eskrita depois avaliasaun dokumental hotu. Ohin ezame eskrita ba STJ hahú, aban Sabadu no Domingu sei deskansa, no iha loron 21 komesa fali,” dehan Avelino ba jornalista sira iha SFJJ, Sesta-feira (18/09/2026).
Nia hatutan katak, husi kandidatu 34 ne’ebé tama iha lista, maioria tuir prosesu ezame eskrita. Iha faze selesaun dokumentus, kandidatu na’in rua la hetan admisaun.
Avelino esplika katak, komisaun nia responsabilidade mak administra prosesu rekrutamentu, inklui loke konkursu, prepara dokumentus no regulamentu, no halo kontratasaun ho juri. Depois konkursu loke ona, dokumentus kandidatu sira entrega ba juri, no komunikasaun direta entre kandidatu no juri.
“Komisaun administra deit prosesu. Materia ezame komisaun la hatene tanba segredu liu juri mak hatene. Atu evita espekulasaun, materia jeral bele inklui Konstituisaun, direitu, Kódigu Sivil no Kódigu Penal, maibé perguntas espesífiku komisaun la hatene,” nia esplika.
Ezame ba STJ sei hala’o iha loron 18 no 21 Setembru, enquanto ba Tribunal Rekursu sei hala’o iha loron 25 no 28 Setembru.
Depois ezame eskrita remata, juri sei avalia no fó sai rezultadu diretamente ba kada kandidatu. Kandidatu ne’ebé pasa sei kontinua ba faze entrevista profisionál. Kandidatu ne’ebé la pasa iha direitu atu halo reklamasaun iha prazu loron 15.
Avelino hateten katak, reklamasaun tenke dirije ba juri, la’ós ba komisaun ka Konsellu Superior Magistratura Judisial (KSMJ). Juri mak sei halo verifikasaun ba reklamasaun no deside tuir rezultadu no valor ne’ebé hetan.
Nia mos hateten katak, depois ezame remata, juri ida-idak sei presiza tempu entre loron lima to’o loron 10 atu korrije no prepara rezultadu antes komunika ba kandidatu sira.
Konkursu ba STJ iha komponente kandidatu tolu, mak juízes karreira ho esperiénsia tinan 10 ka liu, juristas ho esperiénsia tinan 15 ka liu, no procuradores ho esperiénsia tinan 10 ka liu. Enkuantu vaga ba Tribunal Rekursu, konkursu ne’e destina ba juízes.
Akadémiku Universidade Nasionál Timor-Leste (UNTL), Rafael de Jesus apela atu fó konfiansa ba juri no husu atu prosesu ezame hala’o ho rigor.
“Fiar katak teste ne’e sei hala’o diak no rigor, atu deside se maka tur iha STJ tenke iha kapasidade diak, atu lori justisa iha Timor-Leste lao ba oin,” dehan Rafael.
Nia hatutan katak, juízes Timor-oan ne’ebé konkore agora iha oportunidade atu hatudu sira-nia kapasidade liu husi prosesu ezame, no rezultadu mak sei hatudu kandidatu sira ne’ebé pasa ba faze tuirmai.
(ter)
