DILI, STLTIMORLESTE.com – Liuhusi 8.000 aplikante konkore ba 478 vaga saúde iha Hospital Nasional Guido Valadares (HNGV), ne’ebé prosesu seleksaun dokumentus hahú ohin.
Diretór Servisu Apoiu Diagnóstiku no Terapêutiku HNGV, Vidal de Jesus Lopes hatete, aplikasaun rejista durante períodu 7 to’o 18 Setembru.
Nia hatete, kandidatu sira hatama dokumentus ho númeru referénsia hamutuk 20, ho total aplikante liu 8.000.
“Vaga iha deit 478, maibé aplikante liu 8.000, no agora foin tama primeira faze,” dehan Vidal ba Jornalista ihá HNGV Bidau, Segunda (21/09/2026).
Tuir nia, seleksaun dokumentus sei halao husi 21 to’o 26 Setembru, iha edifísiu Komisaun Funsaun Públika (KFP).
Ekipa juri sei verifika dokumentus kandidatu sira, inklui asinatura, dokumentu orijinál no kumprimentu kritériu ne’ebé determina ona.
Kandidatu ne’ebé dokumentus falta, la asina, la orijinál ka la kumpre kritériu sei elimina no la bele kontinua ba faze tuir mai.
Kandidatu ne’ebé pasa seleksaun dokumentus sei kontinua ba teste eskrita, ne’ebé sei halao iha edifísiu KFP.
Vidal hatete, prosesu teste sei halao ho transparénsia, tuir prosedimentu rekrutamentu ne’ebé determina husi KFP.
“Juri kompostu husi HNGV, Ministériu Saúde no KFP, no rekrutamentu lao tuir prosedimentu normal,” dehan Vidal.
Nia hatete, rekrutamentu 478 vaga bazeia ba orsamentu ne’ebé Parlamentu Nasionál aprova ona ba HNGV.
Vaga sira inklui médiku jeral A/1 hamutuk 112, enfermeiru jeral júnior A/1 hamutuk 236 no enfermeiru jeral júnior B/1 hamutuk 14.
HNGV mós loke 30 vaga ba asistente enfermajen, 25 vaga ba parteira profisionál júnior A/1 no 10 vaga ba parteira profisionál júnior B/1.
Ba tékniku aliadu saúde, vaga sira inklui radiolojia 10, análize laboratóriu 4, banku ran 3 no fisioterapia 2.
Vaga seluk mak tékniku biomediku 3, nutrisaun 3, rekordu médiku 4 no farmásia 5, tuir kategoria ne’ebé HNGV anúnsiu ona.
HNGV mós determina kór mapa dokumentus tuir kategoria kandidatu, atu fasilita identifikasaun durante prosesu rekrutamentu.
Médiku uza mapa verde, enfermajen azul, parteira mean, tékniku aliadu kinor, asistente enfermajen laranja no asistente TDTSP chocolate.
Vidal hatete, nesesidade rekursu umanu iha tinan sira tuirmai sei haree tuir lakuna no prioridade servisu saúde iha HNGV.
Nia mós hatete, edifísiu hospitalar presiza kompleta ho instalasaun, ekipamentu médiku no medikamentu antes bele opera ho kapasidade tomak.
Entretantu, aplikante Arnaldo da Cruz hatete graduadu barak seidauk hetan servisu, tanba kompetisaun ba vaga 478 aas.
Nia hatete, iha primeira faze aplikante sira dudu malu atu entrega dokumentus lalais, ho esperansa bele pasa ba faze tuirmai.
Aplikante seluk, Grasilda Pereira hatete, graduadu barak halo voluntariadu iha ospitál no klinika atu mantein koñesimentu no esperiénsia prátika.
Nia husu prosesu seleksaun lao ho justisa no transparénsia, atu Timor-oan kualifikadu hotu bele konkore ho igualdade.
(dom)
