DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Loro Dias Ximenes dehan, dala barak iha eventu neebe mak iha, media officer sira halo fali knaar hanesan jornlista, ida nee hanesan impedimentu ida ba jornalista sira, dala ruma halao sira nia knaar ladun iha kobertura.
Kestaun nee hatoo husi SEKOMS, Expedito Loro Dias Ximenes ba jornalista sira, hafoin remata enkontru ho media officer sira iha Salaun Maria Goreti SEI, Kaikoli, Dili, Tersa (29/07/2025).
Tema ba enkontru nee mak “Papel Ofisial Media Viziabilidade IX Governu Konstituisional iha Komunikasaun Sosial” ho nia objetivu komunikasaun sosial ka ofisial media governu nia hotu-hotu bele partilha informasaun kona-ba atividade sira neebe iha kada instituisaun sira divulga informasaun ba publiku ho kredivel.
“Dala barak iha eventu barak neebe media officer sira halo tiha knaar hanesan jornalista, entaun iha impedimentu balun neebe dala ruma halo jornalista sira halao sira nia knaar ladun iha kobertura, tanba media officer sira taka hotu ho sira nia fotografia no sira nia asesu ba oin, tanba nee mak ohin ita hasoru malu, halo diskusaun no ba oin oinsa atu hadia,” dehan Expedito Dias.
Nia dehan, enkontru ohin loron nee esplika ba media ofisial sira kona-ba kontribuisaun sira nia envolvementu iha parte informasaun iha linhas ministeriais idak-idak nia, atu esplika diak liu tan kona-ba dezenvolvimentu dijital neebe oras nee daudaun atravesa iha Ministeriu sira, atu nunee Ministeriu sira bele komprende diak liu tan kona-ba avansa teknolojia era informasaun no era dijital.
“Husu ba ofisial media sira servisu prinsipal neebe media ofisial tenke halo mak halo komunikadu imprensa iha Ministeriu idak-idak nia ho kualidade, purtantu Komunikadu Imprensa nee ho objetivu oinsa bele lori informasaun husi Ministeriu nia servisu loron-loron nia ba iha publiku liu husi pajina Ministeriu nia, mos hatoo ba pajina IX Governu Konstituisional”, katak nian.
Nia mos husu atu media officer nia servisu oinsa mak atu bele atende Ministeriu nia iha Ministeriu neebe nia servisu ba, jornalista neebe halo kobertura atu bele hatoo ba iha publiku liu husi meius komunikasaun sosial neebe iha.
Iha fatin hanesan, Deonizia Tilman husi Media officer Sekretariu Estadu Eletrisidade Agua e Saneamentu dehan, ohin partisipa iha atividade ida nee pontus importante neebe iha mak nuudar media ofisial sira halao servisu ho lo-loos no labele okupa fali jornalista sira nia fatin.
“Labele okupa liu jornalista sira nia fatin iha serimonia importante sira neebe iha, ida nee hanesan fo informasaun neebe importante atu ami bele lao tuir hodi idak-idak halao servisu ho lo-loos,” katak Deonizia Tilman.
Entretantu Asesor Tekniku Media ofisial Sekretariu Estadu Igualdade (SEI), Pedro Ximense hatoo agradese ba SEKOMS tanba bele organiza progrma ba atividade, media ofisial sira nian, oinsa atu haforsa servisu iha lina ministeriu sira nian.
“Media ofisial nee hanesan fonte ida neebe liga ba media ho instituisaun, maibe liga fila-fali ba Sekretariu Estadu igualdade (SEI), inklui atividade sira seluk SEI sempre fasilita komunikadu imprensa ba jornalista inklui mos iha linhas ministerial sira,” nia hakotu.
(EST 1)
